Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 56 Hüküm no: 17 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize ve Ayşe’nin babalarından intikal eden menzili işgal eden Zehiroğlu Mehmed ile muhakeme olunmaları Ma‘rûz-ı dâ‘îleridir ki Sâdır olan fermân-ı âlîlerine imtisâlen hâlâ medîne-i Trabzon nâibi Mahmud Kâşif Efendi’nin mührü mutâbık arzı ve hâmişinde mastûr derkenâra nazar olundukda medîne-i Trabzon mahâllâtından Kasım Ağa mahallesi sâkinelerinden Hafize ve Âişe bintey Ahmed b. Ali nâm hatunlar meclis-i şer‘de şöyle takrîr-i kelâm eylediler ki kırk bir sene mukaddem fevt olan babamızdan müntakil mahalle-i mezbûrede kâin bir tarafdan Abdullah Efendi menzili ve bir tarafdan Tonyalı Ahmed mülkü ve bir tarafı Alaybeyizâde Hurşid Ağa hânesi ve taraf-ı râbi‘i tarîk-i âm ile mahdûd bir bâb mülk menzil-i mevrûsumuzu târîh-i mezkûrda mahalle-i mezbûre ahâlîsinden Zehiroğlu Mehmed nâm kimesne ba‘zı mütegallibeye istinâd ile fuzûlî zabt ve târîh-i mezkûrdan beri vâzı‘u’l-yed olmuş ise de el-ân tagallübü zâil olmağla menzil-i mezkûru merkūmdan da‘vâ ve istirdâd için da‘vâ-yı mezkûrenin mahâllinde rü’yet ve ihkāk-ı hak olunmak bâbında bir kıt‘a emr-i âlîşânın sudûru niyâzıyla istid‘â-yı inâyet olunduğu meâl-i arz-ı mezkûrdan müstefâd ve husûs-ı mezkûre dâir Dîvân-ı hümâyûn tarafından emr-i âlî verildiğinin kaydı bulunmadığı mefhûm-ı derkenârdan müstebân olmağla bu sûretde derûn-ı arzda mastûretü’l-ism Hafize ve Âişe Hatun’un hasm ittihâz etdikleri mezbûr Zehiroğlu Mehmed nâm kimesnenin tegallübü vâki‘ ise müdde‘iyyetân-ı mezbûretânın babaları vefât edeliden beri taleb ve iddi‘â cihetinden vâki‘ olan sükûtları özr-i şer‘îye mebnî olmağla hasımları olan merkūm Zehiroğlu Mehmed’in vech-i meşrûh üzere tegallübü mahâllinde ba‘de’s-sübûti’ş-şer‘ tarafeyn bi’l-muvâcehe terâfu‘-i şer‘-i şerîf olunarak ihkāk-ı hak olunmasını âmir hâlâ Trabzon vâlîsiyle nâibine hitâben bir kıt‘a emr-i âlîşân ısdârı muvâfık-ı şer‘-i şerîf idüğü huzûr-ı âlîlerine i‘lâm olundu. Fî 25 C sene [12]52.