Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 91 Hüküm no: 92 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzade Sultan Mehmed Han evkafına bağlı Maltepe ve tevabii mukataası gelirlerinin zarardan korunması hakkındaki emre uyulması Akzâ kuzâti’l-müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘ü a‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn, el-muhtassu bi-mezîd-i inâyeti’l-meliki’l-mu‘în, mevlânâ Üsküdar kādısı -zîdet fezâiluhû- ve kıdvetü’l-kuzât ve’l-hükkâm, ma‘denü’l-fazli ve’l-kelâm mevlânâ Kartal kadısı -zîde fazluhum- Haremeyn-i Muhteremeyn’e tâbi‘ evkāfdan İstanbul’da vâki‘ merhûm Şehzâde Sultân Mehmed Han -tâbe serâhu- evkāfı mukāta‘âtından olup kıdvetü’l-emâsil ve’l-akrân Seyyid Ahmed -zîde kadruhû- işbu sene-i mübârekede iltizâmen uhdesinde olan Maldepe ve tevâbi‘i mukāta‘ası hudûdu dâhilinde vâki‘ arazi ve tapu ile verile gelen mahâller öteden beri voyvoda temessüküyle zabt u rabt oluna gelmiş iken bu esnâda mukāta‘a-i mezbûre karyeleri re‘âyâları <> zâbit-i vakfın tapu temessüküne adem-i rağbet birle ba‘zan kuzât ve nüvvâb hüccetleriyle ve ba‘zan bilâ-sened fuzûlî zabt edüp îrâd-ı mukāta‘a kesr ve noksân tertîbine bâ‘is olmağla ol makūlelerin yedlerinde olan senedlerine ma‘rifet-i şer‘le ba‘de’n-nazar arazi-i vakfı kuzât ve nüvvâb hüccetleriyle zabt edenlerin yedlerinde olan senedleri ahz ve mûcebince tapu temessükü verilüp ve hiç senedleri olmayanlara dahi müceddeden tapu temessükü verilüp fîmâ-ba‘d kuzât ve nüvvâb hüccetleriyle arazi-i vakf zabt etdirilmemek üzere arzuhâlleriyle istid‘â etmekle zikr olunan Maldepe ve tevâbi‘i mukāta‘ası senevî dört bin iki yüz elli guruş mâl ile Ali Arif Bey’in mâlikâne uhdesinde olduğu ve bu makūle arazi mutasarrıflarının yedlerinde olan temessükleri ma‘rifet-i şer‘le yoklanup yedlerinde ma‘mûlün-bih temessükâtlı olanlar ibkā ve zâyi‘ olanlara meccânen temessük ve olmayanlara müceddeden temessük verilmek ve yedlerine ferâğ ve intikāl eylediği takdirde kadîmisi üzere zâbit-i mukāta‘a tarafından tapu temessükü verilüp kādı ve nüvvâb hücceti ile alınıp satılmak şurûtundan idiği Haremeyn Muhasebesi’nde <> derkenâr olunmağla şurûtu mûcebince emr-i şerîfim verilmek bâbında iftihârü’l-ümerâ ve’l-ekâbir müstecmi‘u cemî‘u’l-âlem [20a] bi’l-fi‘il başdefterdârım İbrahim Sarim -dâme uluvvuhû- telhîs etmekle imdi telhîs mûcebince amel olunmak bâbında fermân-ı âlîşânım sadaka ve ihsân buyurdum ki hükm-i şerîfim vardıkda bu bâbda sâdır olan emrim üzere amel edüp dahi vakf-ı mezbûre arazisine mutasarrıf olanların yedlerinde olan temessükleri ma‘rifet-i şer‘le yoklanup yedlerinde ma‘mûlün-bih temessükâtı olanları ibkā ve zâyi‘ olanlara meccânen temessük ve olmayanlara müceddeden temessük verüp ve birbirlerine ferâğ ve intikāl olduğu takdirce kadîmisi üzere zâbit-i mukāta‘a tarafından tapu temessükü verile mugāyir-i şurût hareket ile cânib-i mukāta‘aya gadr ve hasâret etdirmeyesiz şöyle bilesiz alâmet-i şerîfe i‘timâd kılasız. Tahrîren [fi’l-yevmi]’r-râbi‘ ışrîn Zilka‘de sene [1]180