Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 57 Hüküm no: 18 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memiş Bölükbaşı’nın Sarraf Fındık’da olan alacağından dolayı Simyonoğlu Yorgi’yi taciz etmemesi Ma‘rûz-ı dâ‘îleridir ki, Sâdır olan fermân-ı âlîlerine imtisâlen işbu arzuhâl ve hâmişinde mastûr derkenâra nazar olundukda Nevşehir mütemekkinlerinden Yuvanoğlu Sarrâf Fındık zimmînin ücretle hizmetkârı olup bundan akdem zimmî-yi mersûm ba‘zı mahallerden bu kullarına zimemât havâlesi ile Nevşehir’de sâkin Memiş Bölükbaşı’ya beş bin ve Hacı Osman Efendi’ye beş bin guruş düyûnuna bu kullarını kefîl verip bu kulları dahi zimemâtdan alırsam edâ ederim diyerek ta‘ahhüd eyledikden sonra zimemâtdan bir akçe tahsîl etmeyip mezbûr Memiş Bölükbaşı ile iki yüz elli senesi kazâ-i mezbûr mahkemesinde mürâfa‘a olunup bir şey lâzım gelmediğine binâen hüccet verilip müdâhale olunmaz iken şimdi merkūmlar zimmî-yi mersûma verdikleri mebâliğ-i mezkûreyi bu kullarından iddi‘â ederek külle-yevmin rencîde etmek sevdâsında olmalarıyla hüccet-i şer‘iyye ve fetvâ-yı şerîf mûcebince bir kıt‘a emr-i âlî i‘tâsı bâbında sâhib-i arzuhâl Simyonoğlu Yorgi zimmî istid‘â-yı inâyet eylediği meâl-i arzuhâl-i mezkûrdan müstefâd ve bu husûsa dâir Dîvân-ı hümâyûn tarafından emr-i âlî verildiğinin kaydı bulunmadığı mefhûm-ı derkenârdan müstebân olmağla bu sûretde sâhib-i arzuhâl olan mersûm Simyonoğlu Yorgi zimmînin işbu arzuhâlinde merbût hüccetde mastûr Memiş Bölükbaşı nâm kimesnenin Yuvanoğlu Sarrâf Fındık zimmetinde olan mebâliğ-i matlûbesinden dolayı mesfûr Simyonoğlu Yorgi zimmîye bî-vech-i şer‘î eylediği tazyîk ve iz‘âcı vâki‘ ise mahâllinde ma‘rifet-i şer‘-i şerîfle men‘ ü def‘ olunmasını âmir Nevşehir nâibiyle voyvodasına hitâben bir kıt‘a emr-i âlîşân i‘tâsı muvâfık-ı şer‘-i şerîf idüğü huzûr-ı âlîlerine i‘lâm olundu. Fî 27 B sene [1]252.