Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 57 Hüküm no: 19 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikâhlı eşi Meryem’in, kendisinin yokluğunda başkasıyla nikâhlandığına dair Ahron’un şikâyeti Hüve’r-rahîm Hâlâ revnak-efzâ-yı mesned-i vâlâ-yı Sadâret-i Anadolu ve Naīîbü’l-eşrâf Selim Mollazâde devletlü inâyetlü âtıfetlü celle’n-ni‘am ve’l-eltâf es-Seyyid Abdurrahim Efendi hazretlerinin zamân-ı devletlerinde vukū‘-yâfte olan senedât-ı şer‘iyye kuyûdudur. Fî-gurreti L sene [1]252. Sâdır olan fermân-ı âlîlerine imtisâlen arzuhâl eden Ahron zimmînin Merzifon kazâsı re‘âyâsından Yazıcıoğlu Ohannes nâm zimmînin kızı Meryem Nasrâniye dört seneden beri taht-ı nikâhında zevcesi olup mersûm Ahron zimmî diyâr-ı âharda iken kazâ-i mezkûr re‘âyâsından Araboğlu Makdisi Karabet ve Ecdaroğlu Makdisi Manik nâm zimmîlerin garaz ve nefsâniyetlerine binâen Nasrâniye-i merkūmeyi yine kazâ-i mezkûr re‘âyâsından Gazeloğlu Mikail nâm zimmîye hilâf-ı şer‘-i şerîf nikâh ile vermişler olduklarını bahis ile yedinde olan fetvâ-yı şerîfe mûcebince mahâllinde terâfu‘-i şer-i şerîf ve ihkāk-ı hak olunmak ve eğerçi mahâllinde ihkāk-ı hak mümkün olmaz ise âhar husûsa memûr mübâşir ma‘rifetiyle li-ecli’t-terâfu‘ Der-aliyye’ye celb ü ihzâr kılınmak bâbında bir kıt‘a emr-i âlîşân i‘tâsını mersûm Ahron zimmî istid‘â-yı inâyet eylediği arzuhâli müfâdından müstebân olup fi’l-hakīka Nasrâniye-i mersûme mersûm Ahron zimmînin taht-ı nikâhında olduğu vâki‘ ve mütehakkık ise ber-mûceb-i fetvâ-yı şerîfe şer‘an akd-i sânî sahîh olmamağla bu sûretde mahâllinde bi’l-muvâcehe terâfu‘-i şer‘-i şerîf ve lede’s-sübût ihkāk-ı hak olunmak iktizâ edip ancak istid‘âsı üzere mahâllinde terâfu‘-i şer‘ ve ihkāk-ı hak olunmak ve mahâllinde ihkāk-ı hak mümkün olmadığı hâlde husemâsı mersûmûn husûs-ı âhara memûr mübâşir ma‘rifetiyle Der-aliyye’ye celb ve ihzâr kılınmak üzere kazâ-i mezbûr nâibi ve voyvodasına hitâben emr-i âlîşân i‘tâsı re’y-i rezîn-i hazret-i men-lehü’l-emre menût idüğü huzûr-ı âlîlerine i‘lâm olundu. Fî 3 Za sene [1]252.