Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 58 Hüküm no: 20 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İflas eden ve hapisten çıkarılan Triko’nun alacaklıları tarafından tekrar hapsettirilmesinin kanunsuz olduğu Sâdır olan fermân-ı âlîlerine imtisâlen Mudanya kazâsına tâbi‘ Sığı karyesi re‘âyâsından Triko v. Dimitraki zimmînin arzuhâli ve yedinde olup sene-i sâbıkā Şevvâli’l-mükerreminin on üçüncü günü târîhiyle müverraha ve kazâ-i mezkûr nâibi Fetvâ Emînizâde es-Seyyid Mehmed Zühdü Efendi’nin imzâ ve hatemini hâviye bir kıt‘a hüccet-i şer‘iyyeye nazar olundukda mersûm Triko zimmî zimmetinde karye-i mezbûre ahâlîlerinden Musli Bey ve Hırsofi nâm zimmîye zeytin esmânından dört bin dört yüz yetmiş üç guruş mahkûmün-bih deyni için karye-i mezbûre subaşısı meclisinde üç ay müddet mahbûs olup ba‘dehu bi’l-cümle emvâl ve eşyâ ve emlâki sûk-ı sultaniyede bey‘ olundukda cem‘an bâliğ olan iki bin altı yüz on yedi guruş esmânı ashâb-ı düyûnu beynlerinde garâmeten taksîm olundukda medyûn-ı mersûmun ismi mâl ıtlâk olunur nesnesi kalmayıp müflis ve mu‘dim ve mu‘sir olduğu mütehakkık ve sâbit olmağla hapisden ıtlâk ve sebîli tahliye olunmuş iken medyûn-ı mersûmun diğer dâyinleri Armudlulu Mustafa ve Gemlikli Lazari ve Yamandi zuhûr ve medyûn-ı mersûmdan beş bin yüz on guruş mütâlebesiyle hapis etdirmek dâ‘iyesinde olmalarıyla men‘ ü def‘leri bâbında bir kıt‘a emr-i âlî sudûru istid‘â olunduğu meâl-i arzuhâl ve hüccet-i mezkûr mefhûmundan müstebân olup fi’l-hakīka bu makūle iflâsı şer‘an sâbit olup sebîli tahliye olunan medyûnun yesârı sâbit ve mütehakkık olmadıkça hapis olunması meşrû‘ olmadığına binâen medyûn-ı mersûmun yesârını diğer dâyinleri mersûmûn isbât etmeksizin fuzûlî hapsetdirmek dâ‘iyesinde oldukları vâki‘ ise ma‘rifet-i şer‘le men‘ ü def‘ olunmak îcâb-ı şer‘-i şerîfden olup ber-vech-i istid‘â emr-i şerîf i‘tâ buyurulmak re’y-i rezîn-i hazret-i men-lehü’l-emre menût idüğü huzûr-ı âlîlerine i‘lâm olundu. Fî 9 M sene [1]253.