Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 59 Hüküm no: 22 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacımirasyedioğlu Osman’ın kardeşi Ayşe Hatun aleyhindeki miras davasında anlaşma sağlanması Sâdır olan fermân-ı âlîlerine imtisâlen arzuhâl ve derkenâr ve arzuhâlde beyân olunan Akçaşehir-i Bolu nâibi Mehmed Aşır Efendi’nin imzâsı hâvî mührü mutâbık bir kıt‘a hüccet-i şer‘iyyeye nazar olundukda kazâ-i mezkûra tâbi‘ Fazıllı Dîvânı’na muzâfe Göçüllü karyesi ahâlîsinden Hacımirasyedioğlu Osman b. Hacı Mehmed nâib-i mûmâ-ileyhin mahâllinde münâza‘un-fîh olan kazâ-i mezkûre tâbi‘ Çukalı İskelesi çarşısında kâin mahâlde kazâ-i mezkûr a‘yânı serbevvâbîn-i dergâh-ı mu‘allâdan el-Hâc Mehmed Emin Bey ile hüccet-i mezkûrede mastûrü’l-esâmî sâir Müslimîn huzûrunda akdeylediği meclis-i şer‘de zikri âtî münâza‘un-fîh olan mahalle vaz‘-ı yedi mütehakkıka olan kazâ-i mezkûre tâbi‘ Kirameddin karyesi sâkinelerinden Âişe Hatun bt. el-Hâc Ali’nin zevci ve tarafından vekîl olduğu hüccetde mezkûreyi’l-ism şâhideyn-i mu‘addileyn ile sâbit olan Mustafa b. Ömer mahzarında üzerinde akd-i meclis olunan hudûd ve sınırı derûn-ı hüccet-i mezkûrede muharrer Mandıra ta‘bîr olunur kayık rabt ve kayık âlâtı vaz‘ olunur mülk mahal ve mağaza misillü sagīr oda arsası babası müteveffâ Hacı Mehmed’den hasran müdde‘î-i mezbûr Osman’a mevrûs olmuş iken müvekkile-i mezbûre Âişe mahâll-i mezkûra [5a] bi-gayr-ı hakkın fuzûlî vaz‘-ı yed edip merkūm Osman babası merkūmun fevtinde sagīr bulunmuş ve a‘zâr-ı şer‘iyye-i sâire dahi mütehakkık olup el-hâletü hâzihî zafer bulmağla da‘vâya tasaddî ve müdde‘âsını bi’l-muvâcehe ber-nehc-i şer‘î ba‘de’l-isbât hükm olunmak esnâsında bâ-tavassut-ı muslihîn mahâll-i mezkûr beş hisse i‘tibârıyla üç sehmi müdde‘î-i merkūm Osman ve iki sehmi müvekkile-i mezbûre Âişe Hatun’un olmak üzere bi’t-terâzî beynleri tevfîk ve ıslâh olunarak kat‘-ı nizâ‘ ve husûs-ı mezkûra müte‘allika da‘vâdan tarafeynden her biri âharın zimmetini kabûlü hâvî asâleten ve vekâleten ibrâ ve iskāt eyledikleri bir kıt‘a hüccet-i şer‘iyyeye rabt olunmağla ber-mûceb-i hüccet-i şer‘iyye amel ve hareket olunmak bâbında bir kıt‘a emr-i âlîşân ısdâr ve ihsân buyurulmak istid‘â-yı inâyet olunduğu meâl-i arzuhâl ve nâib-i mûmâ-ileyhin imzâsı hâvî sene-i sâbıkā Zilka‘detü’ş-şerîfesi’nin on birinci günü târîhiyle müverraha mührü mutâbık hüccet-i mezkûresi mefhûmundan müstefâd ve müstebân ve hüccet-i mezkûr fenn-i sakka mutâbık ve mazmûn-ı şer‘-i şerîfe muvâfık olmağla bu sûretde ber-vech-i istid‘â bir kıt‘a emr-i âlîşân ısdâr ve ihsân buyrulması menût-ı re’y-i âlî idüğü huzûr-ı [âlîlerine i‘lâm olundu]. Fî 5 M sene [12]53.