Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 60 Hüküm no: 23 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin Dimyat kazasında ibka olunması ve zayi olan beratının yenilenmesi Sâdır olan fermân-ı âlîlerine imtisâlen arzuhâl ve derkenâra nazar olundukda diyâr-ı Mısriye’den Dimyat kazâsı diyâr-ı merkūme kuzâtı eşrâfından terk-i tarîk etmekle mağdûr ve müsinn ü ihtiyâr ve rükûb ü nüzûle adîmü’l-iktidâr ve vücûhla inâyet ü ihsân-ı hümâyûna sezâvâr olan Hafız Mehmed Efendi’ye tarîkinin bedeli iki yüz kırk sekiz senesi Muharremi’l-harâmı gurresinden zabt etmek üzere bâ-fermân-ı âlî ber-vech-i te’bîd tevcîh olunmakla el-yevm üzerinde olduğu Dîvân-ı hümâyûn Kalemi’nden muhrec emr-i âlî kaydından müstebân ve merkūm Hafız Mehmed kazâ-i mezkûre ber-vech-i muharrer ber-vech-i te’bîd mutasarrıf olup yedinde olan emr-i âlîşânı zâyi‘ olmağla zâyi‘den yedine müceddeden bir kıt‘a emr-i âlîşân i‘tâsını istid‘â eylediği meâl-i arzuhâlden nümâyân ve merkūm fi’l-hakīka kazâ-i mezbûre ber-vech-i te’bîd mutasarrıf olduğu tarîk-i mezbûrun ser-levha-i yemîn ve yesârı Abdi Efendi ve Hafız Ahmed Efendi nâm kimesnelerin haberleriyle zâhir ve mütehakkık olmağla vech-i meşrûh üzere kazâ-i mezbûr yine ber-vech-i te’bîd merkūmun uhdesinde ibkā ve yedine zâyi‘den müceddeden emr-i şerîf-i âlîşân i‘tâsı istid‘â-yı inâyet olunduğu huzûr-ı [âlîlerine i‘lâm olundu]. Fî 23 S sene [1]253.