Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 61 Hüküm no: 24 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merzifon kaza naibliğinden azledilen Mehmed Tevfik Efendi’nin görev süresine ait imza harcının verilmesi Sâdır olan fermân-ı âlîlerine imtisâlen istid‘â ve derkenâra nazar olundukda memâlik-i mahrûsetü’l-mesâlik-i şâhânede vukū‘ bulan masârıf-ı mu‘tâdenin senede iki def‘a defter-i tevzî‘i ma‘rifet-i şer‘-i şerîf ve vülât ve mütesellimîn ve voyvoda ve vücûh ma‘rifetiyle bi’t-tanzîm hâkimü’ş-şer‘ bulunanlar tahrîr ve imzâ ve ber-mu‘tâd guruşda birer paradan harc-ı imzâlarını ahz ü istîfâ eylemeleri usûlünden ise de Rûz-ı Kasım ve Rûz-ı Hızır tevzî‘inden evvel nâibinin hasbe’l-iktizâ azl ve tebdîlinde mu‘tâd olan harc-ı imzânın bi-hesâb yevmü’l-kıst nâib-i halef ve selef beynlerinde taksîm olunması mukaddemâ şeref-rîz-i sudûr eden irâde-i seniyye îcâbından idüğü derkenârdan ve Anadolu’da Merzifon ve Merzifonâbâd kazâlarının defter-i tevzî‘i henüz vürûd etmemiş ve aralık aralık tenkîh-i defâtire memûr efendi bendelerinin takrîrine binâen bâ-emirnâme-i sâmî tenbîh ve tehdîd olunmuş ise de yine ukde-i tesvîfde kalmış idüğü memûr-ı mûmâ-ileyhin inhâsından müstebân ve kazâeyn-i mezkûreteynin sâbık nâibi Mehmed Tevfik Efendi kazâ-i mezbûrdan bin iki yüz elli iki senesi Zilka‘detü’ş-şerîfesi gurresinde azl ve yerine âhar nâib ta‘yîn buyurulmuş ve kazâeyn-i mezbûreynin senede iki def‘a defter-i tevzî‘i olup bir defter şühûr-ı Rûmiye’den Mart duhûlünde ve diğeri Eylül hulûlünde olmak müte‘ârif olduğundan ol vechile nâib-i sâbık-ı merkūmun Mart i‘tibârıyla zamân-ı azli sene-i mezbûre Martı’na ancak bir mâh kalarak bi-hesâb yevmü’l-kıst beş aylık harc-ı imzâ kendüye ve fakat bir mâha isâbet eden meblağ halefi olan kimesneye i‘tâ olunmak iktizâ-yı irâde-i seniyyeden olduğunu bahisle ber-vech-i muharrer beş aylık harc-ı imzâdan hisse-i musîbesinin ber-mûceb-i irâde-i seniyye alıverilmesini istid‘â eylediği meâl-i arzuhâl ve şifâen takrîrinden müstefâd olmağla bu sûretle evvel emirde kazâeyn-i mezbûreynin defâtir-i tevzî‘âtı sâir memâlik misillü mahallerinden der-bâr-ı şevket-karâra takdîm ve nizâm ve emsâli vechile memûr-ı mûmâ-ileyh ma‘rifetiyle tenkîh ve îcâbı icrâ ve nâib-i sâbık-ı merkūmun istid‘âsı üzere ber-mu‘tâd harc-ı imzâdan beş mâha isâbet eden her ne ise nizâmı vechile nâib-i sâbık-ı merkūma alıverilmek mukaddemâ şeref-bahş-ı sudûr eden fermân-ı âlîşân muktezâsından olmağın vech-i meşrûh üzere kazâeyn-i mezbûreynin tevzî‘ât defterlerinin emsâli misillü der-adle takdîmi ve ber-mu‘tâd harc-ı imzâdan nâib-i sâbık-ı merkūmun bi-hesâb yevmü’l-kıst beş aylık hissesine isâbet eden harc-ı imzânın merkūma alıverilmesi bâbında kazâeyn-i mezkûreynin tâbi‘ olduğu sancak vâlisine hitâben bir kıt‘a emr-i âlî ısdârı menût-ı re’y-i âlî idüğü huzûr-ı âlîlerine i‘lâm olundu. Fî 3 R sene [12]53.