Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 62 Hüküm no: 25 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim ve Ahmed’e vefat eden babaları Hüseyin’den intikal eden terekeden hisselerinin tahsili Sâdır olan fermân-ı âlîlerine imtisâlen istid‘â ve derkenâra nazar olundukda Dazkırı kazâsına tâbi‘ Başmakçı karyesi sâkinlerinden olup iki yüz kırk iki senesi vefât eden Fedâîzâde Hacı Hüseyin’in terekesinden olan ma‘lûmü’l-mikdâr emvâl ve eşyâ ve nükūd-ı mevcûdesi zevcesi Şerife nâm Hatun yedinde bulunduğundan ketm ve ihfâ ile müteveffâ-yı mezbûrun âhar zevcesinden mütevellidler sulbî sagīr oğulları İbrahim ve Ahmed’in hisse-i irsiyelerini vermeyip memleketi olan Isparta’ya gidip eşyâ ve nükūd-ı mezkûreyi ol tarafda akrabasından Hacı Hüseyin nâm kimesneye emâneten bırakıp geçen sene hacc-ı şerîfe azîmet ile esnâ-i râhda müteveffiye olmağla sagīrân-ı merkūmânın ammileri ve bâ-hüccet- şeriyye vasîleri es-Seyyid Battal nâm kimesne eşyâ ve nükūd-ı mezkûreye vâzı‘u’l-yed olan merkūm Hacı Hüseyin ile lede’t-terâfu‘i’ş-şer‘ sâbit ve mütehakkık olduğu hâlde sagīrân-ı mezbûrânın hisse-i musîbeleri ma‘rifet-i şer‘le alıverilip icrâ-yı şer‘-i şerîf ve ihkāk-ı hak olunmak bâbında sene-i sâbıkā Zilka‘detü’ş-şerîfesinde mülhakātıyla Redif-i mansûre Konya ferikliği rütbe-i refî‘asıyla Hamid sancağı mutasarrıfı el-Hâc Osman Paşa hazretleriyle Isparta nâibine hitâben mübâşiri ma‘rifetiyle bir kıt‘a emr-i şerîf-i âlîşân ve mûcebince emirnâme-i sâmî ısdâr buyurulmuş olduğu derkenârdan müstebân ve emr-i şerîf-i mezkûr ve emir-nâme-i sâmîye cevâb olarak Dazkırı nâibi es-Seyyid Ali Azmi Efendi dâ‘îlerinin i‘lâmı hülâsasında müteveffâ-yı merkūmun malı olmak üzere derûnunda altın olan bir memhûr çekmeceyi zevce-i müteveffiye-i sâniye mezbûre Şerife’nin emriyle müteveffâ-yı merkūm Hacı Hüseyin’in hânesinden Korucuoğlu Hacı Mustafa ve Kadrioğlu Mehmed nâm kimesneler ba‘de’l-ahz zevce-i mezbûre Şerife’ye i‘tâ etmiş olmalarıyla ol vechile çekmece-i mezbûre müteveffiye-i mezbûrenin vârisi olan kız karındaşı oğlu Isparta kazâsı sâkinlerinden Hacı Numan’ın zimmetinde kalmış olduğunu mezbûrân Hacı Mustafa ve Mehmed hikâye ve takrîr etmiş oldukları muharrer olup ancak bu makūle memhûr ve mukaffel çekmece derûnunda mücerred altın var imiş deyü mechûlü da‘vâ mesmû‘ ve meşrû‘ olmayıp ve henüz vasiyy-i merkūm es-Seyyid Battal tashîh-i da‘vâ etmemiş olmağla bu sûretde vasiyy-i merkūm tashîh-i da‘vâ ederek husemâsı merkūmûn ile mahâllinde bi’l-muvâcehe ferîk-i müşârün-ileyh huzûrunda ma‘rifet-i şer‘-i şerîf ile terâfu‘-i şer‘-i şerîf ve ihkāk-ı hak olunmak bâbında mukaddemâ ısdâr ve tisyâr buyurulan emr-i şerîfin te’kîdini hâvî ferîk-i müşârün-ileyh hazretleriyle Isparta nâibi ve mübâşirine hitâben bir kıt‘a emr-i âlîşân ısdârı menût-ı re’y-i âlî idüğü huzûr-ı [âlîlerine i‘lâm olundu]. Fî 9 R sene [12]53.