Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 63 Hüküm no: 26 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in kefaletten dolayı ödemiş olduğu parayı taleb etmesi Sâdır olan fermân-ı âlîlerine imtisâlen sâhib-i arzuhâl es-Seyyid Mehmed nâm kimesne Çamardı kazâsında Adırmusun [Koyunlu] karyesi ahâlîsinden olup bundan akdem vefât eden el-Hâc Musa nâm kimesnenin hayûtunda Niğde kazâsına tâbi‘ İlsun karyesi sâkinelerinden Hadice nâm hatundan iki yüz otuz dokuz târîhinde iktirâz ve kabz ve umûruna sarfla istihlâk eylediği cennet-mekân Sultan Selim Han tâbe serâhu sikkesiyle meskûk iki yüz elli aded yüzlük ve iki yüz aded ikilik deynini kable’l-edâ ve’l-îfâ medyûn-ı merkūm Hacı Musa fevt olmağla zikr olunan yüzlük ve ikiliğin misillerinden kıymeti dûn olan dört bin iki yüz seksen guruşu cihet-i kefâletden işbu târîhden üç sene mukaddem mezbûre Hadice Hatun’a edâ ve teslîm etmekle meblağ-ı mezkûru merkūm tereke-i vâfiyesinden verese-i münhasırasından bi’l-mürâca‘a taleb eyledikde misillerini edâda muhâlefet ve dûn teklîf eylediklerinden bahisle yedinde olan fetvâ-yı şerîfe mûcebince mahâllinde şer‘le mürâfa‘a ve ihkāk-ı hak olunmak bâbında bir kıt‘a emr-i âlîşân i‘tâsını istid‘â-yı inâyet eylediği meâl-i arzuhâl ve şifâhen takrîrinden müstebân olup ancak merkūm es-Seyyid Mehmed’in meblağ-ı mezkûra kefâlet-i mezkûresi müteveffâ-yı mezbûr el-Hâc Musa’nın emri ile oldu isbâta mütevakkıf olmağla bu sûretde merkūm es-Seyyid Mehmed mahâllinde müteveffâ-yı merkūmun verese-i münhasırası muvâcehesinde lede’t-terâfu‘ müdde‘âsı ber-nehc-i şer‘î sâbit ve mütehakkık olduğu hâlde yedinde olan fetvâ-yı şerîfe mûcebince icrâ-yı şer‘-i şerîf ve ihkāk-ı hak olunmak iktizâ edip ol bâbda istid‘âsı vechile ma‘den-i hümâyûn emîni ve Niğde nâibine hitâben bir kıt‘a emr-i âlî ısdârı menût-ı re’y-i âlî idüğü huzûr-ı [âlîlerine i‘lâm olundu]. Fî 21 R sene [12]53.