Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 63 Hüküm no: 27 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Mudanya Mahkemesi’ne mukayyid tayin olunması Sâdır olan fermân-ı âlîlerine imtisâlen mahrûse-i Galata’ya muzâfe Mudanya nâhiyesi nâibi müderrisîn-i kirâmdan Fetvâ Emînizâde es-Seyyid Mehmed Zühdü Efendi dâ‘îlerinin mührü mutâbık i‘lâmı ve hâmişinde mastûr derkenâra nazar olundukda nâhiye-i mezbûre mahkemesinde mukayyid olmadığı vukū‘ bulan hücec-i şer‘iyye ve defâtir-i kassâm ve tevârüd eden evâmir-i seniyyenin ekseriyâ sebt-i sicil olmamasına bâ‘is ü bâdî olmağla nâhiye-i mezkûre mahkemesinde o makūle vukū‘-yâfte hücec-i şer‘iyye ve senedât-ı mer‘iyye ve evâmir-i seniyyeyi sebt ve kayd-ı sicil edip lede’l-hâce kaydları sicill-i mahfûzdan ihrâç olunmak üzere bir ehl-i müstahık kimesnenin bâ-berât-ı âlîşân müstakıllen mukayyid nasb u ta‘yîn olunması lâzım ve Mustafa b. Halil Akif nâm kimesnenin mukayyidlik hizmetinde istihdâm olunmağa ehliyet ve istihkākı mütehakkık olduğundan mahkeme-i mezkûre mukayyidliği merkūma tevcîh ve yedine müceddeden berât-ı şerîf-i âlîşân sadaka ve ihsân buyurulmak istid‘â-yı inâyet olunduğu i‘lâm-ı mezkûrdan müstebân ve memâlik-i mahrûsede kâin mahkemelere bâ-berât-ı âlî başkâtib nasbı bundan akdem bâ-fermân-ı âlî memnû‘ ise dahi mukayyidlik husûsu mezkûr olmadığı derkenârdan münfehim olmağla bu sûretde mukayyidlik-i mezkûr ber-vech-i istid‘â merkūm Mustafa’ya tevcîh ve yedine müceddeden berât-ı şerîf-i âlîşân sadaka ve ihsân buyurulması menût-ı re’y-i âlî idüğü huzûr-ı âlîlerine i‘lâm olundu. Fî 21 R sene [12]53.