Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 92 Hüküm no: 93 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Todoraki’nin evini Kostandi v. Yorgaki’ye sattığı Kartal kasabasında mütemekkin Aci Todoraki v. Sofyanoz zimmî meclis-i şer‘-i hatîrde işbu râfi‘ü’r-rakīm Kostandi v. Yorgaki zimmî muvâcehesinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup kasaba-i mezbûrede vâki‘ bir tarafı Dimitraki menzili ve bir tarafı Şişman Tanaş menzili ve bir tarafı kale duvarı ba‘zan Kostandi menzili arsası ve bir tarafı tarîk-i âm ile mahdûd fevkānî iki bâb oda ve dehliz ve tahtında ahır [ve] bir mikdâr avlu ve kenîf ve bi’r-i mâyı müştemil bir bâb mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık Sûk-ı Sultânî’de ba‘de’l-müzâyede üç yüz guruşa ve yine kapağıyla altmış beş vakıye arak kazganımı altmış beş guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūm Kostandi zimmîye cem‘an üç yüz altmış beş guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semen-i misilleri olan meblağ-ı mezkûr üç yüz altmış beş guruşu müşterî-i merkūm yedinden bi’t-tamâm ve’l-kemâl ahz ü kabz eyledim menzil-i mezkûrun ve kazgan-ı mezbûrun gabn ü tağrîrlerine müte‘allıka âmme-i da‘vâdan zimmetini ibrâ ve iskāt eyledim fîmâ-ba‘d zikri mürûr eden menzilde ve kazganda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim [kalmayup] müşterî-i merkūm Kostandi zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-şehri Rebî‘i’l-âhir li-sene ihdâ ve semânîn ve mi’ete ve elf. Şuhûdü’l-hâl: Serdâr Mehmed Ağa b. Ali, Osman Ağa, Yemişçiler Kâtibi Ali Efendi, İmam Kasım Efendi, İmam es-Seyyid Hacı Mehmed Efendi, Yemişci el-Hâc Ahmed, Şehir Kethüdâsı Ahmed Beşe. Manol v. Balas, Nikigos v. Bogos, Aci Yanaki v. Hıristo, Tanaş v. Hıristo, Papa Dimo v. Kostandi, Zaniti v. İstorşiyos zimmî.