Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 65 Hüküm no: 29 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın terekesinden hak iddiasında bulunanların muhakemeleri Sâdır olan fermân-ı âlîlerine imtisâlen işbu arzuhâl ve merbût olan medîne-i Kütahya kazâsı Nâibi Ahmed Nafiz Efendi dâ‘îlerinin mührü mutâbık i‘lâmı ve yine nâib-i mûmâ-ileyhin imzâ ve hatemini hâviye bir kıt‘a hüccet-i şer‘iyyeye nazar olundukda fi’l-asl medîne-i mezkûrede Kal‘a-i cedîd mahallesi sükkânından olup Eskişehir kazâsında sâkin iken bundan akdem vefât eden el-Hâc Ali Ağa b. Ebubekir b. Osman’ın zâhirde Eskişehir kazâsında sâkineler bir nefer zevcesi ve bir nefer sulbiye kızından mâ‘adâ vâris-i ma‘rûfu olmamak zu‘muyla müteveffâ-yı mezbûrun kırk bin guruşdan mütecâviz terekesini zevcesiyle kızı müstakıllen ba‘de’l-ahz ve’l-kabz medîne-i mezbûre ahâlîsinden es-Seyyid Ebubekir ve es-Seyyid Hacı Ahmed ve es-Seyyid İbrahim ebnâ-i Abdülbaki b. Ahmed b. Halil nâm karındaşlardan ancak sâhib-i arzuhâl es-Seyyid Ebubekir medîne-i mezbûrede meclis-i şer‘de müteveffâ-yı mezbûr Hacı Ali Ağa’nın babası Ebubekir’in babası Osman ile kendisinin ve karındaşları mezbûrân es-Seyyid Hacı Ahmed ve es-Seyyid İbrahim’in babaları Abdülbaki’nin babası Ahmed’in babası Halil li-ebeveyn karındaşlar olup babaları ismi Murad ve dedeleri ismi Abdullah ve anaları ismi Havva bt. Mehmed ve maskat-ı re’sleri mahalle-i mezbûre olup ol vechile müteveffâ-yı mezbûrun verâseti zevce ve kerîmesi mezbûretân ile min-ciheti’l-usûbeti’n-nesebiye kendüye ve karındaşları gāib ani’l-meclis mezbûrân Hacı Ahmed ve İbrahim’e münhasıra olduğunu mahzar-ı hasm-ı câhidde ber-nehc-i şer‘î ba‘de’l-isbât ve’l-hükm bir kıt‘a isbât-ı verâset hücceti i‘tâ olundukdan sonra verese-i merkūmûn hüccet-i mezkûreyi bi’l-istishâb Eskişehir kazâsı nâibi Kırımîzâde es-Seyyid Hasan Efendi huzûrunda tereke-i müteveffâ-yı mezbûra vâzı‘ateyi’l-yed oldukları mütehakkık olan zevce ve bint-i müteveffâ-yı mezbûr ile lede’t-terâfu‘ mazmûn-ı hüccet-i mezkûre ve ber-minvâl-i meşrûh verâsetlerini şâhideyn-i mu‘addileyn ile bi’l-muvâcehe ba‘de’l-isbât ve’l-hükm hisse-i irsiyelerini zevce ve bint-i müteveffâ-yı mezbûrun vâzı‘ateyi’l-yed oldukları tereke-i müteveffâ-yı mezbûrdan müdde‘ûn-ı merkūmûndan alıverilmek esnâsında zevce ve bint-i müteveffâ-yı müdde‘ûn-ı mezbûrûnun gıyâblarında nâib-i merkūm huzûruna isbât etmiş oldukları kimesneler müdde‘ûn-ı merkūmûn asebeden olmayıp zevi’l-erhâm olduklarını ihbâr etmişler olduklarını nâib-i merkūm müdde‘ûn-ı merkūmûna ifâde ve mugāyir-i şer‘-i şerîf ibtâl-i hakka mütecâsir olmalarıyla husûs-ı mezbûr Kütahya muhassılı sa‘âdetlü Dilaver Paşa hazretleri tarafından nâib-i merkūma tahrîr olundukda kazâ-i mezbûr sancak-ı âhar olduğundan mücerred müdde‘ûn-ı merkūmûnun zevi’l-erhâmdan oldukları ihbâr olunduğunu <> nâib-i merkūm i‘lâm ederek ihkāk-ı hak olunamadığını bahisle husûs-ı mezbûr Kütahya’da Paşa-yı müşârün-ileyh huzûrunda yâhud Dârü’l-hilâfeti’l-aliyye’de şer‘le rü’yet ve ihkāk-ı hak olunmak bâbında bir kıt‘a emr-i âlîşân ısdârı istid‘â-yı inâyet olunduğu i‘lâm-ı mezkûrdan müstefâd olup fi’l-hakīka derdest olunan hüccet-i şer‘iyyeye nazaran müdde‘ûn-ı merkūmûnun min-ciheti’l-usûbeti’n-nesebiye verâsetlerine hükm-i şer‘î lâhık olduğu zâhir [6b] ve ber-vech-i muharrer hükm-i şer‘î lâhık oldukdan sonra hilâfına beyyine ikāmesi mesmû‘ olmayacağı bedîhî ve bâhir olmağla bu sûretde tarafeyn paşa-yı müşârün-ileyh huzûrunda ma‘rifet-i şer‘-i şerîfle terâfu‘ olunmak üzere Kütahya’ya havâlesi yâhud tarafeyn Der-aliyye’ye celb ve ihzâr ve lede’t-terâfu‘ ihkāk-ı hak olunması emr-i savâb ve şıkkaynden hangisi muvâfık-ı i‘âde-i seniyyeleri olur ise ol bâbda îcâbı vechile bir kıt‘a emr-i âlîşân ısdârı menût-ı re’y-i âlî idüğü huzûr-ı [âlîlerine i‘lâm olundu]. Fî 25 R sene [12]53.