Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 66 Hüküm no: 30 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım’ın vefat eden babası Ali’nin terekesinden dolayı üvey annesi Emetullah ile yeniden muhakeme olunmaları Ma‘rûz, Mübârek rikâb-ı kamer-tâb-ı müstetâba takdîm olunan işbu arzuhâl hâmişinde sâdır olan fermân-ı âlîlerine imtisâlen istid‘â ve derkenâra nazar olundukda Emine nâm hatunun babası Ahmedoğlu demekle ma‘rûf Ali nâm kimesne bundan akdem fevt oldukda bi’l-cümle emvâl ve eşyâsı bi’l-irsi’ş-şer‘î bununla üveyi anası müteveffânın zevcesi İbradi kasabası sâkinelerinden Emetullah nâm hatuna intikāl etmiş iken kendisi ol evânda sagīre bulunduğundan üveyi vâlidesi mezbûre hâric-ez defter-i kassâm on bin guruş nakid ve eşyâsını zabt eylediğinden mâ‘adâ kasaba-i mezbûre toprağında vâki‘ mülkiyet üzere mutasarrıf olduğu arsasını dahi fuzûlî zabt etmekle babasından müntakil hâric-ez defter-i kassâm zabt eylediği ol mikdâr guruşdan hisse-i irsiyesiyle arsa-i mezkûreyi taleb eyledikde vermeyip gad[r]-ı küllî eylediğinden yedinde olan fetvâ-yı şerîfe mucebince mahâllinde terâfu‘-i şer‘-i şerîf ve ihkāk-ı hak olunmak bâbında emr-i âlîşân sudûrunu mezbûre Emine bundan akdem lede’l-istid‘â, ol bâbda İbradi kazâsı nâibine ve Alâiye sancağı mütesellimine hitâben iki yüz elli senesi Zilka‘detü’ş-şerîfesi’nde bir kıt‘a emr-i âlîşân i‘tâ olundu[ğu] derkenârdan ve husûs-ı mezbûr için mahâllinde bilâ-terâfu‘ müdde‘iyye-i mezbûre cebr ve kerh ile beş yüz guruş i‘tâ ve meblağ-ı mezbûrun yüz guruşun tekrâren yedinden ahzolunarak def‘ birle ihkāk-ı hak olunamadığını bahisle emr-i şerîf-i mezkûrun te’kîdini hâvî bir kıt‘a emr-i âlîşân ısdârını yine mezbûre Emine istid‘â-yı inâyet eylediği arzuhâli müfâdından münfehim olmağla bu sûretde istid‘âsına müsâ‘ade-i seniyye erzânî buyurulup ber-vech-i istid‘â mukaddemâ sâdır olan emr-i âlînin te’kîdini hâvî müceddeden bir kıt‘a fermân-ı âlîşân i‘tâsı re’y-i rezîn-i hazret-i men-lehü’l-emre menût idüğü huzûr-ı [âlîlerine i‘lâm olundu]. Fî 5 Ca sene 1253.