Balat Mahkemesi 2 Numaralı Sicil (H. 970 - 971 / M. 1563) cilt: 11, sayfa: 243 Hüküm no: 372 Orijinal metin no: [67a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Kiryakos’un evini Yeniçeri Ağası Ali Ağa b. el-Hâc Mustafa’ya sattığı Nasrânî Yorgi v. Kiryakos kıbelinden bey‘ ve kabz-ı semene vekâleti bimâ hüve tarîki’s-subût şer‘an sâbit olan zimmî Andon b. İstemad, âtiyyü’zikr menzili, Yeniçeri Ağası diye ma‘rûf fahrü’l-a‘yân zahrü’l-erkân Ali Ağa b. el-Hâc Mustafa kıbelinden iştirâ ve def‘-i semene vekâleti Mevlânâ Kadı Hüsam b. el-Hâc Bekir ve râcil Mehmed b. Abdullah nâm kimesnelerin şehâdetleri ile sâbit olan Mehmed Çelebi b. el-Hâc Bekir’e bey‘ ettiğini vekâlet-i mahkiyesi ile bi’l-vekâle ikrâr etti. Müşterî-i mezbûr da zimmî-i merkūmun sâhibi ve mâliki olduğu, mahmiye-i Kostantıniyye hâric-i bâb-ı Cebe Ali’de vâki‘, tahtânî bir beyti, fevkānî iki beyti, iki odayı, tahtapuşu, üstünde oda bulunan …? bir mevzi‘i müştemil olan ve bir tarafdan İskender b. Abdullah mülkü, diğer tarafdan Hristodoros v. Kofino? mülkü ve öteki tarafdan tarîk-i âm ve diğer tarafdan da bahr ile mahdûd bulunan cemî‘ menzili cümle hudûdu ile râyicü’l-vakt altmış bir bin akçe semen-i mu‘ayyen-i makbûzla iştirâ etti. Müşterî-i mezbûr, vâki‘ ikrârı tasdîk etti. Ramazan b. Ahmed ve Hüseyin Bey b. Abdullah nâm kimesneler, menzil-i mezbûrun derkine îcâb ve kabûlü hâvî kefâletle kefîl oldu. Cerâ fî evâsıtı Zilhicce sene 970. Şuhûdü’l-hâl: Bayezid Ağa el-ma‘rûf kethüdâ-i yeniçeriyân, Mehmed Ağa Rumeli Ağası, Evrenos subaşı ser-piyâde, Murad subaşı ser-bölük, Mehmed b. Abdullah es-sipâhi, Mehmed b. Abdullah er-râcil, Mehmed b. İlyas, Şeyh b. Abdullah el-imâm, Behrâm b. İbrahim, Mustafa Çelebi b. Abdi, Hasan Bey b. Abdullah el-ma‘rûf bi solak ve gayruhüm