Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 68 Hüküm no: 32 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ereğli Karaman kazası eski naibi Mehmed Rüşdü Efendi’ye tevzi defteri gereğince istihkakı olan imza harcının teslim olunması Ma‘rûz, Sâdır olan fermân-ı âlîlerine imtisâlen Ereğli Karaman kazâsı nâibi sâbık es-Seyyid Mehmed Rüşdü Efendi’nin takdîm eylediği işbu arzuhâlinde iki yüz elli iki senesi Zilhiccetü’ş-şerîfesi gurresinden kazâ-i mezbûrdan munfasıl ve Mehmed Efendi nâm kimesne halef olduğuna binâen ol vechile kazâ-i mezbûrun <> sene-i mezbûre Rûz-ı Kāsımı’ndan elli üç senesi Rûz-ı Hızırı’na gelince masârıfâtı defter-i tevzî‘âtdan guruşda birer paradan iktizâ eden harc-ı imzâdan ber-mûceb-i irâde-i seniyye nizâmı vechile be-hesâb yevmü’l-kıst dört mâh müddetine isâbet eden meblağın kendüye alıverilmesini istid‘â-yı inâyet eylediği arzuhâlinden müstefâd ve kazâ-i mezbûrun sene-i mezkûre Rûz-ı Kāsımı’ndan elli üç senesi Rûz-ı Hızırı’na gelince defter-i tevzî‘i yekûnu elli beş bin iki yüz kırk guruşa bâliğ olmuş olduğu Dîvân-ı hümâyûn derkenârından nümâyân ve fi’l-vâki‘ nâib-i merkūm Mehmed Rüşdü Efendi’nin gurre-i mâh-ı merkūmdan infisâli elli üç senesi Rûz-ı Hızırı’na iki mâh kalarak vâki‘ olmağla defter-i mezkûr harc-ı imzâsından be-hesâb yevmü’l-kıst dört mâha isâbet eden meblağ nâib-i merkūm es-Seyyid Mehmed Rüşdü Efendi’ye ve iki mâha isâbet eden meblağ halefi merkūm Mehmed Efendi’ye i‘tâ olunmak nizâmı îcâbından olmağla bu sûretde defter-i mezkûrda harc-ı imzâ kaç guruş olduğu tenkîh-i defâtir memûru efendi bendeleri cerîdesinden ba‘de’r-rü’ye ber-minvâl-i muharrer dört mâh müddete isâbet eden meblağ merkūm es-Seyyid Mehmed Rüşdü Efendi’ye ve iki mâh müddete isâbet eden meblağ halefi merkūm Mehmed Efendi’ye i‘tâ olunması nizâm-ı müstahsene iktizâsından olduğu huzûr-ı [âlîlerine i‘lâm olundu]. Fî 21 Ca sene [12]53.