Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 69 Hüküm no: 34 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın mütevellisi olduğu vakfa ait menzil ile Ali Ağa’nın sahibi olduğu mülk dükkânların istibdâli Ma‘rûz, Sâdır olan fermân-ı âlîlerine imtisâlen medîne-i Erzurum nâibi Habibzâde es-Seyyid Abdullah Edib Efendi dâ‘îlerinin mührü mutâbık i‘lâmı hâmişinde mastûr derkenâra nazar olundukda ashâb-ı hayrâtdan Hadice bt. Abdullah nâm vâkıfenin evkāfı müstagallâtından medîne-i mezkûrede Yeğen Ahmed Ağa mahallesinde vâki‘ hudûd ve müştemilâtı i‘lâm-ı mezkûrda muharrer bir bâb vakıf menzil ile yine her birinin hudûd ve müştemilâtı kezâlik i‘lâm-ı mezkûrda beyân olunan medîne-i mezbûrede Tebriz Kapısı’nda vâki‘ bir kepenk alefdar ve yine Küçüksaraçhâne başında vâki‘ bir kepenk sarrâc ve yine Gölbaşı Çarşısı’nda vâki‘ bir kepenk bakkāl ve yine Kel Ahmed Çarşısı’nda kâin birbirine muttasıl iki bâb na‘alband ve mıhçı dükkânları ki cem‘an beş kıt‘a mülk dükkânların istibdâline emlâk-ı mezkûrenin mâlik ve mutasarrıfı olan Ali Ağa b. Veliyyüddin tâlib ve râgıb olduğuna binâen zikr olunan vakıf menzil ve dekâkîn-i mezkûre <> ma‘rifet-i şer‘le keşf ve mu‘âyene olundukda mülk olan dekâkîn-i mezkûre vakıf olan menzil-i mezbûrdan arsaten ve cevdeten ve rağbeten ve kıymeten ekser ve evfer ve ezyed ve istibdâli cânib-i vakfa min-külli’l-vücûh enfa‘ ve evlâ olmağla ber-vech-i muharrer isitibdâlini vakf-ı mezkûrun mütevelliyesi Hadice bt. el-Hâc Mehmed Derviş nâm hatun dahi re’y edip yedine izn-i hümâyûnu mutazammın emr-i âlîşân i‘tâsını istid‘â-yı inâyet eylediği i‘lâm-ı mezkûr meâlinden müstefâd ve bu makūle şerâit-i istibdâl mevcûd olduğu hâlde izni hâvî fermân-ı âlîşân i‘tâsıyla istibdâlinin sıhhati tecvîz-kerde-i fukahâ-yı i‘zâm olmağla bu sûretde ber-vech-i istid‘â şerâit-i istibdâl mevcûde ise zikr olunan [7b] vakıf menzil ile sâlifü’l-beyân beş kıt‘a mülk dükkânların istibdâline izin ve ruhsatı hâvî bâlâsı tuğrâ-yı garrâ ile müveşşah bir kıt‘a emr-i âlîşân sadaka ve ihsân buyurulmak <> menût-ı re’y-i âlî idüğü huzûr-ı [âlîlerine i‘lâm olundu]. Fî 27 Ca sene [1]253.