Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 70 Hüküm no: 35 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Deronoğlu Mıgırdıç’ın Everek’de bahçesine bitişik ve Gözüböyükoğlu Asvador tarafından satın alınan bahçe için şüf‘a hakkını kullanmak istemesi Ma‘rûz, Sâdır olan fermân-ı âlîlerine imtisâlen arzuhâle nazar olundukda arzuhâl eden Deronoğlu Mıgırdıç nâm zimmînin Niğde sancağında Devreli [Develi] kazâsında Re‘âyâ Everek nâm mahâlde kâin bir bâb menziline kurb ve civâr olan bahçede mersûmun hakk-ı şüf‘ası var iken mersûm diyâr-ı âharda iken bahçe-i mezkûru Gözübüyükoğlu Asador nâm zimmî iştirâ ve temellük etmekle mersûm Mıgırdıç zimmî bahçe-i mezkûre şefî‘ olup ve yedinde da‘vâsına muvâfık fetvâ-yı şerîfesi olduğunu bahisle bahçe-i mezkûrenin bi-hükmi’ş-şüf‘a kendüye alıverilmesi bâbında Niğde nâibine hitâben <> bir kıt‘a emr-i âlî ısdârını mersûm Mıgırdıç zimmî istid‘â-yı inâyet eylediği arzuhâli meâlinden müstefâd olup ancak mersûm Mıgırdıç zimmî bahçe-i mezkûre şefî‘ olduğu hâlde bey‘-i mezkûra vâkıf olduğu anda taleb ve ittihâz-ı şüf‘a edip iskāt-ı hakk-ı şüf‘a etmemiş ise lede’s-sübût îcâb ve iktizâsının icrâsı bi’l-muvâcehe terâfu‘-i şer‘-i şerîfe muhtâc olmağla bu sûretde tarafeyn mahâllinde bi’l-muvâcehe ber-nehc-i şer‘î terâfu‘-i şer‘-i şerîf ve ihkāk-ı hak olunmak bâbında ber-vech-i istid‘â kazâ-i merkūm nâibine hitâben bir kıt‘a emr-i âlîşân i‘tâsı menût-ı re’y-i âlî idüğü huzûr-ı [âlîlerine i‘lâm olundu]. Fî 5 C sene [12]53.