Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 71 Hüküm no: 36 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş’ın miras hususunda amcası Kostanti’ye müdahale ve tacizde bulunmaması Sâdır olan fermân-ı âlîlerine imtisâlen medîne-i Niğde kazâsı nâibi el-Hâc Mehmed Emin Efendi’nin mührü mutâbık i‘lâm ve hâmişinde mastûr derkenâra nazar olundukda kazâ-i mezbûr re‘âyâsından Anaştaş nâm zimmînin ammi Kostanti nâm zimmîden husûs-ı mîrâsa dâir müdde‘âsı mahâllinde şer‘le rü’yet ve ihkāk-ı hak olunmak bâbında bin iki yüzelli iki senesi evâil-i Şa‘bânı’nda nâib-i mûmâ-ileyhe hitâben bir kıt‘a emr-i âlîşân ısdâr ve tisyâr olunduğu derkenârdan ve mersûmân mahâllinde ma‘rifet-i şer‘le lede’t-terâfu‘ ve müdde‘î-i mersûm Anaştaş zimmî ammisi Kostanti zimmînin vâzı‘u’l-yed ve müstakıllen tasarrufunda olan bir bâb mülk menzil ve derûnunda ma‘lûmü’l-mikdâr eşyâ ve Sarısperi? nâm mahâlde kürûmu mülk bağ ve İrvanı önünde? bir kıt‘a tarla mersûm Anaştaş zimmînin babası hâlik İstamoz zimmî ile hâlik-i mersûmun karındaşı mesfûr Kostanti zimmînin iştirâken tasarruflarında iken mersûm İstamoz zimmî hâlik olup hissesi oğlu mersûm Anaştaş’a ırsen intikāl etmiş iken ammi mersûm Kostandi zimmî emlâk ve eşyâ-i mezkûreye müstakıllen fuzûlî vaz‘-ı yed ve zabt ü tasarruf etmekle ber-vech-i muharrer nısf hisse-i irsiyesini taleb ve da‘vâ eyledikde, mersûm Kostandi zimmî cevâbında zikr olunan emlâk ve eşyâ babası ve müdde‘î-i mersûmun ceddi hâlik Yorgi zimmînin sağlığında bâ-senedât müstakıllen yedinde mülkü ve kendisi ile müdde‘î-i mersûmun babası hâlik İstamoz zimmî hâlik-i mersûmun oğulları olup iyâlinde iken evvelâ mersûm İstamoz zimmî hâlik olup ba‘dehu mersûm Yorgi hâlik olmağla ol vechile emlâk ve eşyâ-i mezkûre müstakıllen kendüye mevrûs olduğunu bahisle da‘vâya tasaddî ve ber-nehc-i şer‘î bi’l-muvâcehe şuhûd-ı udûlle ba‘de’l-isbât ve’l-hükm mûcebince müdde‘î-i mersûm Anaştaş zimmî da‘vâ-yı mezkûresiyle mersûm Kostandi zimmîye bî-vech-i şer‘î mu‘ârazadan men‘ olunup lâkin mersûm Anaştaş zimmî yine müdâhaleden hâlî olmamağla mersûmun ber-minvâl-i muharrer müdâhalesinin men‘ ü def‘i bâbında bir kıt‘a emr-i âlîşân i‘tâsı istid‘â-yı inâyet olunduğu i‘lâm-ı mezkûre hülâsasından müstefâd ve mazmûn-ı i‘lâm-ı mezkûr şer‘-i şerîfe muvâfık olmağla bu sûretde i‘lâm-ı mezkûr mukaddemâ sâdır olan emr-i şerîf-i mezkûrun kaydı bâlâsına şerh verilerek mersûm Anaştaş zimmînin ber-minvâl-i muharrer ammi mersûm Kostanti zimmîye bî-vech-i şer‘î müdâhale ve mu‘ârazasının men‘ ü def‘i bâbında bir kıt‘a fermân-ı âlîşân i‘tâsı menût-ı re’y-i âlîşân idüğü huzûr-ı [âlîlerine i‘lâm olundu]. Fî 7 C sene [12]53.