Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 72 Hüküm no: 37 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep, Hamide ve Dudu’nun tasarruflarında olan hamam ve menzili işgal eden Ali ile muhakeme olunmaları Ma‘rûz, Sâdır olan fermân-ı âlîlerine imtisâlen meâl-i istid‘â ve derkenâr ve sâbıkā Sinop kazâsı nâibi es-Seyyid el-Hâc Davud Efendi’nin mührü mutâbık i‘tâ eylediği bir kıt‘a hüccetine nazar olundukda medîne-i Sinop kazâsına muzâfe Gerze kasabasında kâin bir bâb mülk hamam nizâ‘ına dâir husûsun mahâllinde şer‘le rü’yet ve ihkāk-ı hak olunması bâbında şehr-i sâbık evâilinde ashâb-ı arzuhâlin husemâsı istid‘âsıyla bir kıt‘a emr-i âlî ısdâr ve tisyâr olunduğu derkenârdan müstebân ve emr-i âlîde muharrer mülk hamam ile kazâ-i mezkûrda kâin bir bâb mülk menzil ashâb-ı arzuhâl Zeyneb ve Hamide ve Dudu nâm hatunların mülk-i mevrûsları iken kasaba-i mezbûr sâkinlerinden Ali nâm kimesne iki yüz kırk senesinden beri ve bi-gayr-ı hakkın fuzûlî zabt etmekle zikr olunan hamam ve menzil ile müddet-i mezkûrede îcâb eden ücretlerini mezbûrât Zeyneb ve Hamide ve Dudu hatunlara teslîme kıbel-i şer‘den tenbîh ve yedlerine hüccet-i şer‘iyye i‘tâ olunduğu bahisle hüccet-i mezkûrun infâz ve icrâsı bâbında bir kıt‘a emr-i âlîşân i‘tâsını mezbûrâtın istid‘â-yı inâyet eyledikleri meâl-i arzuhâlden müstefâd ve hüccet-i mezkûreye em‘ân-ı nazar ve mütâla‘a olundukda mefhûm ve mazmûnu muhâlif-i şer‘-i şerîf olduğundan ihticâca gayr-ı sâlih olup ve ber-minvâl-i muharrer husûs-ı mezkûr için mukaddemce inâyet-rîz-i sudûr eden emr-i âlîşânın mahâlline vürûd ile henüz cevâbı gelmemiş olduğuna binâen husûs-ı mezkûr yine mahâllinde bi’l-muvâcehe ber-nehc-i şer‘î terâfu‘-i şer‘-i şerîf ve ihkāk-ı hak olunmağa mütevakkıf olmağla bu sûretde mukaddemâ sâdır olan emr-i âlîşânın te’kîdini hâvî müceddeden bir kıt‘a emr-i âlîşân i‘tâsı menût-ı re’y-i âlî idüğü huzûr-ı [âlîlerine i‘lâm olundu]. Fî 11 C sene [12]53.