Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 72 Hüküm no: 38 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdatlıoğlu İstefan’ın Sivas’ın Pirkinik köyünde, yolu kapattığı ve su mecrasını değiştirdiğinden şikâyet ettiği Torosoğlu İstefan ile muhakeme olunması Ma‘rûz, Sâdır olan fermân-ı âlîlerine imtisâlen Sivas re‘âyâsından Bağdatlıoğlu İstefan zimmînin takdîm eylediği işbu arzuhâline nazar olundukda kazâ-i mezkûra tâbi‘ Pirkinik karyesinde vâki‘ mülkiyet üzere mutasarrıf olduğu menzili ittisâlinde kadîm olan tarîk-i câdde üzerine Torosoğlu İstefan zimmî kendi hânesine müceddeden nerdüban binâ ve ihdâs ile tarîki sed eylediğinden gayrı mecrâ-yı âb olup kadîmden mâ-i lezîz icrâ olunan tarîki terk ve mersûm İstefan zimmînin mâlik olduğu menzili duvarı kurbünden bi-gayr-ı hakkın icrâ etmekle zarâr-ı mübeyyen-i şer‘îsi olduğunu bahisle mârru’z-zikr muhdes nerdübanın kal‘ ü ref‘i ve mâ-i lezîz-i mezkûrun mecrâ-yı kadîmine icrâsı bâbında bir kıt‘a emr-i âlî ısdârını istid‘â-yı inâyet eylediği arzuhâli meâlinden müstefâd olup fi’l-hakīka mersûm Torosoğlu İstefan zimmînin ber-vech-i muharrer tarîk-i âm üzerine nerdüban binâ ve ihdâs ve tarîki sed [etdi]ği vâki‘ ise müdde‘î-i mersûm kal‘ ü ref‘ etdirmeğe ber-mûceb-i fetvâ-yı şerîfe kādir olacağı mâ-i lezîz-i mezkûrun muhdes olan mecrâsının dahi müdde‘î-i mersûme zarâr-ı mübeyyen-i şer‘îsi olduğu hâlde onun dahi def‘i îcâb-ı şer‘-i şerîfden olmağla bu sûretde husûs-ı mezkûru mahâllinde şer‘le rü’yet ve ihkāk-ı hak olunmak bâbında Sivas vâlîsi ve kazâ-i mezbûr nâibine hitâben bir kıt‘a emr-i âlîşân sadaka ve ihsân buyurulmak menût-ı re’y-i âlî idüğü huzûr-ı [âlîlerine i‘lâm olundu]. Fî 9 B sene [12]53.