Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 73 Hüküm no: 39 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’den bağlanan tımarın çocuklarına tevcihi Ma‘rûz, Sâdır olan fermân-ı âlîlerine imtisâlen arzuhâl ve hâmişinde mastûr derkenâr ve cebelüyân evkāf ve emlâk ümenâsının arzlarına nazar olundukda Hüdâvendigâr sancağında vâki‘ Beypazarı nâhiyesinde nısf Celeblü nâm karyeden dört bin yedi yüz altmış sekiz akçe eşkincilü mülk timâr Mehmed v. İbrahim’in mahlûlünden iki yüz kırk beş senesinde kızları Havva ve Münteha ve Âmine’ye ber-vech-i iştirâk tevcîh olunduğu derkenâr ve sâhib-i arzuhâl Mahmud müteveffâ-yı merkūmun oğlu ve Emetullah nâm bir nefer kızı olup timâr-ı mezbûrun babası mahlûlünden kendisi ile mezbûr Emetullah’a tevcîhi iktizâ eder iken mezbûrât Havva ve Müntehâ ve Âmine müteveffâ-yı mezbûrun kızları olmak üzere hilâf-ı inhâ ile bir-takrîb tevcîh olunmağla mağdûr ve babaları nân pâresinden dûr olduklarını bahisle timâr-ı mezbûr mezbûrâtın ref‘lerinden ve babaları müteveffâ-yı mezbûrun mahlûlünden kendü ile hemşîresi mezbûre Emetullah’a tevcîhi mezbûr Mahmud istid‘â-yı inâyet eylediği arzuhâli meâli ve meclis-i şer‘-i âlî takrîrinden nümâyân ve fi’l-hakīka merkūm Mahmud müteveffâ-yı merkūmun sulbî sahîh oğlu ve hemşîresi mezbûre Emetullah dahi müteveffâ-yı mezbûrun sulbî kızı olup mezbûrât ecânibden ve bu makūle mülk timâr evlâda tevcîh olunageldiği ehl-i vukūf bî-garaz Müslimînden Mustafa İzzet Efendi b. Mustafa ve Mehmed Efendi b. Mustafa nâm kimesnelerin haberleriyle zâhir olmağla timâr-ı mezbûr vech-i meşrûh üzere mezbûrât Havva ve Münteha ve Âmine’nin ref‘lerinden ve babaları müteveffâ-yı merkūmun mahlûlünden mezbûrân Mahmud ve Emetullah’a tevcîhi menût-ı re’y-i âlî idüğü huzûr-ı [âlîlerine i‘lâm olundu]. Fî 12 Ş sene [12]53.