Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 74 Hüküm no: 40 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tırhala kazası kadılığından istifa etmiş olan Mehmed Esad Efendi’nin görev dönemine ait imza harcının ödenmesi Ma‘rûz, Sâdır olan fermân-ı âlîlerine imtisâlen ( ) vilâyet-i Rumeli’de vâki‘ Tırhala kazâsı kādısı sâbık es-Seyyid Mehmed Esad Efendi dâ‘îlerinin takdîm eylediği işbu arzuhâli hâmişinde mastûr derkenâra nazar olundukda kādı-i mûmâ-ileyhin iki yüz elli üç senesi Cumâdelûlâsı gāyetinde müddeti hitâma resîde olarak munfasıl olduğuna binâen ol vechile kazâ-i mezbûrun sene-i mezkûre Muharremi’l-harâmı selhinde vâki‘ Rûz-ı Hızırı’ndan sene-i merkūme Rûz-ı Kāsımı’na gelince ber-mu‘tâd harc-ı defter tevzi‘inden ber-mûceb-i irâde-i seniyye nizâmı vechile be-hesâb yevmü’l-kıst gāyet-i şehr-i mezkûre değin dört mâh müddetine isâbet eden meblağ kendüye ve sene-i mezbûre Cumâdelâhiresi gurresinden Rûz-ı Kāsım duhûlune değin isâbet eden meblağ hakkı tarafında i‘tâsı îcâb edeceğini bahisle Elviye-i hamse mutasarrıfı devletlü Mustafa Nuri Paşa hazretlerinin inzimâm-ı re’y ve ma‘rifetleriyle tesviye ve der-bâr-ı şevket-karâra bi’t-takdîm, emsâli misillü tenkîh ve îcâbı icrâ olunacak kazâ-i mezbûrun Rûz-ı Kāsım tevzî‘i harc defterinden ber-vech-i muharrer müddet-i mezkûresine isâbet eden hissesinin kendüye aldırılması bâbında vezîr-i müşârün-ileyhe hitâben mektûb-ı sâmîleri ısdârını istid‘â-yı inâyet eylediği arzuhâli meâlinden müstefâd ve bu makūle kuzât ve nüvvâbın tevzi‘den evvel hasbe’l-îcâb azl ve tebeddüllerinde harc-ı imzâ-yı defterin halef ve selef beyninde be-hesâb yevmü’l-kıst taksîm ve i‘tâsı ber-mûceb-i irâde-i seniyye nizâmı iktizâsından olduğu derkenârdan nümâyân olup ancak kādı-i mûmâ-ileyhin istîd‘âsı üzere kazâ-i mezbûrun Rûz-ı Kāsım defteri henüz vürûd etmemiş olduğu münfehim olmağla bu sûretde kazâ-i mezbûrun işbu sene-i mübâreke Şa‘bân-ı şerîfinde vâki‘ olan Rûz-ı Kāsım tevzî‘i defteri harc-ı imzâsından ber-mu‘tâd her ne hâsıl olur ise vech-i meşrûh üzere selef ve halef beyninde müddetlerine nazaran taksîm ve kādı-i mûmâ-ileyhin ber-minvâl-i muharrer dört mâh müddetine isâbet eden hisse-i musîbesi kādı-i mûmâ-ileyhe irsâl ve tavsîl ve halefi olan kimesneye isâbet eden meblağdan halefi tarafına i‘tâ buyurulmak iktizâ etmekle ol bâbda vezîr-i müşârün-ileyhe hitâben fermân-nâme-i sâmîleri ısdârı menût-ı re’y-i âlî idüğü huzûr-ı [âlîlerine i‘lâm olundu]. Fî 13 Ş sene [12]53.