Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 75 Hüküm no: 41 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in miras anlaşmazlığına dair zayi olduğu bildirilen ilamın Kütahya Mahkemesi sicillerinden bir suretinin çıkarılarak surete göre muamele olunması Ma‘rûz, Sâdır olan fermân-ı âlîlerine imtisâlen Eskişehir kazâsı nâibi Kırımîzâde es-Seyyid Hasan Edib Efendi’nin i‘lâmı ve hâmişinde Dîvân-ı hümâyûn Kalemi’nden muhrec fermân-ı âlîşân kaydı nâtık olduğu üzere kazâ-i mezkûrda kâin müteveffâ el-Hâc Ali Bey’in irs nizâ‘ı husûsuna dâir mukaddemâ ısdâr ve mübâşiri yediyle tisyâr olunan emr-i şerîf mahâllinde lede’l-vürûd ve’t-terâfu‘, cevâb olarak verilen i‘lâm-ı şer‘î mübâşiri yediyle ba‘de’t-takdîm i‘lâm-ı mezkûr zâyi‘ olmuş ve husûs-ı mezkûr mahsûs müvellâ ta‘yîniyle mahâllinde terâfu‘-i şer‘ ve ihkāk-ı hak olunmak üzere tekrâr fermân-ı âlîşân ısdârı istid‘â kılınmış olup ancak husûs-ı mezkûr ber-minvâl-i muharrer Kütahya’da terâfu‘ olunmak üzere mukaddemâ emr-i âlî-yi mezkûr ısdâr ve mübâşiri yediyle tisyâr ve ber-mûceb-i emr-i âlî mahâllinde lede’t-terâfu‘ i‘lâm-ı şer‘î i‘tâ olunduğu zâhir olmağla bu sûretde zâyi‘ olduğu ihbâr olunan mukaddemâ mürâfa‘adan verilen i‘lâm-ı mezkûrun Kütahya Mahkemesi sicill-i mahfûzundan nüsha-i sâniyesi ihrâç ve der-bâr-ı şevket-karâra takdîm ve husûs-ı mezkûrun şek ve şüpheden ârî sıhhat ve hakīkati i‘lâm ve inhâ olunmak üzere Redif-i hâssa Hüdâvendigâr ferîkliği rütbe-i celîlesiyle Kütahya ve Karahisar-ı sâhib sancakları mutasarrıfı atûfetlü Dilaver Paşa hazretleri ve Kütahya nâibi efendi dâ‘îlerinden ba‘de’l-isti‘lâm i‘lâm-ı mezkûrun nüsha-i sâniyesi der-i adle vürûd ve mazmûnu ma‘lûm oldukdan sonra îcâbının icrâsı iktizâ etmekle ol vechile i‘lâm-ı mezkûrun nüsha-i sâniyesinin takdîm ve husûs-ı mezkûrun i‘lâm ve inhâ olunmak bâbında paşa-yı müşâr ve nâib-i mûmâ-ileyhimâya hitâben bir kıt‘a mektûb-ı sâmî-i hazret-i Sadâret-penâhî ısdârı menût-ı re’y-i âlî idüğü i‘lâm olundu. Fî-selhi Za sene [12]53.