Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 75 Hüküm no: 42 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasuluk kazası naibliğinden ayrılan Ahmed Fahri Efendi’ye görev dönemine ait imza harcının ödenmesi Ma‘rûz, Sâdır olan fermân-ı âlîlerine imtisâlen vilâyet-i Anadolu’da vâki‘ Ayasuluk kazâsı nâibi sâbık es-Seyyid Ahmed Fahri Efendi dâ‘îlerinin takdîm eylediği işbu arzuhâlinde iki yüz elli üç senesi Recebi’l-ferdi gurresinden kazâ-i mezbûrdan munfasıl olduğuna binâen ol vechile kazâ-i mezbûrun sene-i mezkûre Muharremi’l-harâmı selhinde vâki‘ Rûz-ı hızır’dan sene-i merkūme Rûz-ı Kāsımı’na gelince masârıfâtı defter-i tevzî‘inden ber-mu‘tâd guruşda bir paradan iktizâ eden harc-ı imzâdan ber-mûceb-i irâde-i seniyye nizâmı vechile be-hesâb ba‘de’l-kıst beş mâh müddetine isâbet eden mebâliğin kendüye alıverilmesini istid‘â-yı inâyet eylediği arzuhâlinden müstefâd ve kazâ-i mezbûrun elli iki senesi Rûz-ı Hızırı’ndan sene-i merkūme Rûz-ı Kāsımı’na gelince masârıfâtı yekûnu kırk iki bin dokuz yüz seksen guruşa bâliğ olmuş idüğü Dîvân-ı hümâyûn’dan muhrec derkenârdan nümâyân ve fi’l-vâki‘ nâib-i merkūm es-Seyyid Ahmed Fahri Efendi’nin gurre-i mâh-ı merkūmdan infisâli sâlifü’z-zikr elli iki senesi Rûz-ı Hızır’ından beş mâh hulûlünde vâki‘ olmağla defter-i mezkûr harc-ı imzâsından be-hesâb yevmü’l-kıst beş mâha isâbet eden meblağ nâib-i merkūm es-Seyyid Ahmed Fahri Efendi’ye i‘tâ olunmak nizâmı îcâbından olmağla bu sûretde defter-i mezkûrda harc-ı imzâ kaç guruş olduğu tenkîh-i defâtir memûru efendi bendeleri cerîdesinden ba‘de’r-rü’ye ber-minvâl-i muharrer beş mâh müddete isâbet eden meblağ nâib-i sâbık merkūm es-Seyyid Ahmed Fahri Efendi’ye alıverilmesi nizâm-ı müstahsene iktizâsından olduğu huzûr-ı [âlîlerine i‘lâm olundu].