Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 76 Hüküm no: 43 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu’ya bağlı Ayandon ve Akkaya kazaları mahkemelerinin birbirinden ayrılması Ma‘rûz, Sâdır olan fermân-ı âlîlerine imtisâlen meâl-i istid‘â ve derkenâra nazar olundukda Kastamonu sancağında vâki‘ Ayandon ve Akkaya kazâlarına kadîmden başka başka nâib ve hâkim gitmekde iken çend seneden beri Ayandon nâibi tarafından bâ-mürâsele nâib ikāme olunmakda ve bu cihetle gûnâ-gûn ta‘addî vukū‘ bulmakda olduğundan bahisle kadîmî vechile Akkaya kazâsına başkaca Dersa‘âdet’den nâib irsâli istid‘â-yı inâyet olunduğu meâl-i arzuhâl ve merbût olan mahzardan müstebân ve ber-mantûk-ı kuyûd kazâeyn-i mezbûreyn başka başka olarak avârız ve nüzûlhânelerine mukayyed olup ve bu makūle kazâeynin birbirinden tefrîk ile başka başka nâib ikāmesi husûsuna dâir bir gûnâ kuyûd olmamağla hilâf-ı kānûn ve mugāyir-i şürût olmadığı derkenârdan nümâyân olmağla bu sûretde ber-mûceb-i istîd‘â kazâeyn-i mezbûreynin birbirinden tefrîk ve başka başka nâib irsâlinde beis olmamağla kazâeyn-i mezbûreyn ber-vech-i muharrer bi’t-tefrîk sâlifü’z-zikr Akkaya kazâsına Dersa‘âdet’den başkaca nâib irsâli menût-ı re’y-i âlî ve işâret-i aliyye-i hazret-i Şeyhülislâmî’ye mütevakkıf idüğü huzûr-ı [âlîlerine i‘lâm olundu]. Fî 13 M sene [12]54.