Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 76 Hüküm no: 44 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’da Karaağaç, Hoca Mehmed Karamanî ve Veledikoz? mahallelerine akan suyun miktarının artırılması Ma‘rûz, Sâdır olan fermân-ı âlîlerine imtisâlen mahrûse-i Bursa nâibi Şerif Ahmed Efendi’nin i‘lâmı ve mütesellimi Dergâh-ı âlî kapıcıbaşılarından el-Hâc Mustafa Ağa’nın inhâsı ve derkenârlara nazar olundukda mahrûse-i Bursa’da vâki‘ Karaağaç ve Hoca Mehmed Karamânî ve Veledikoz? mahallelerine mahrûse-i mezbûre fevkinde vâki‘ Naldeliği ta‘bîr olunur sakabdan cereyân eden âb-ı lezîz mahâllât-ı mezkûrede vâki‘ menâzil hâbiyelerine vefâ etmeyeceğinden başka sakab-ı mezkûrun kadîmine bir rub‘ ve zam ve ilâve ile vefâ edeceği mukaddemâ i‘lâm olunarak mahâllinde şer‘le görülmek bâbında iki yüz elli iki senesi evâhir-i Şa‘bânı’ndan şerâit-i adîde derciyle sâdır olan emr-i âlîşânı ser-rişte ederek mahâllât-ı mezkûrede mütemekkin Ermeni tâifesi mâ-i mezkûru kendi menzillerine icrâ ile mahrûse-i mezbûrenin altı kıt‘a mahâllâtında sâkin ehl-i İslâmın zarûret ve muzâyakalarına bâ‘is ü bâdî oldukları ehl-i İslâm tarafından mukaddemâ bâ-arzuhâl lede’l-inhâ ve’l-istid‘â mahâllinde şer‘le görülüp münâza‘un-fîhâ olan su kadîmü’l-eyyâmdan beri ne mahâlden ve ne vechile cereyân edegelmiş ise yine ol mahâlden ve ol vechile kadîmî üzere icrâ etdirilmesi bâbında muahharren diğer bir kıt‘a emr-i âlî sâdır ve mahâlline lede’l-vürûd ber-mantûk-ı emr-i âlî sakab-ı mezkûr mahâllinden kal‘ ü ref‘ ve sene-i mâziye evâil-i Rebî‘u’l-ûlâsı târîhiyle müverraha ehl-i İslâm ve tâife-i mersûmûn yedlerine başka başka emr-i âlîşân i‘tâ buyurulmuş olduğu derkenârdan nümâyân ve husûs-ı mezkûrun hakīkat-i <> hâli âb-ı mezkûr Gökdere suyundan ifrâz ve oluklar ile şehre cereyân edip nihayet esnâ-i tarîkde mersûmûnun mahâllâtına başka biri ifrâz ve ihrâç olunmakda ve âb-ı müfrez-i mezkûr mersûmûnun mahâllâtından başka Eşrefîler ve İshakşah ve Hacıbaba ve Velediharrat mahallelerine dahi cereyân etmekde olduğu ve el-hâletü hâzihî ifrâz ve icrâ olunan su ancak birkaç mahâllât hâbiyelerine vefâ ederek zeylinde olan zikr olunan mahâllâta bir vechile cereyân vefâ etmeyeceği ve mukaddemâ karârı üzere sakab-ı mezkûrun bir rub‘u zamla icrâ olunduğu hâlde ba‘zı sızındı ve oluklardan takātur eden sulardan sakab-ı mezkûre zam ve ilâve olunarak eyyâm-ı sayfda alâ-tarîkı’l-münâvebe mahâllât-ı merkūme ahâlîleri idâre olunmakda olduğu ve şehre cârî olan âb-ı mezkûr sakab-ı mezkûra nazaran külliyetli olup her ne kadar vefâ eder ise de mecrâlarının harâbiyetinden lâyıkıyla cereyân etmeyip tarîklerde telef ve zâyi‘ olup ve’l-hâsıl sakab-ı mezkûr bundan akdem karâr verildiği vechile bir rub‘u zam ve ilâve ve sızındı ve katarâtı dahi cem‘ ile cereyânına ruhsat verildiği sûretde eyyâm-ı şitâda mikdâr-ı kifâye ve eyyâm-ı sayfda alâ-tarîkı’l-münâvebe menzillerine cereyân ederek tarafeyn muzâyakadan vâreste olacakları cihetle sakab-ı mezkûr mahâllinden kal‘ ve bir rub‘ zam olunarak tekrâr mahâllinde vaz‘ olunması husûsuna ruhsat-ı seniyye erzânî buyurularak mukaddem ve muahhar sudûr eden evâmir-i aliyyenin kaydları terkīniyle i‘lâm-ı hâli mutazammın müceddeden bir kıt‘a emr-i âlî ısdârı istid‘â-yı inâyet olunduğu meâl-i i‘lâm ve inhâdan müstefâd oldukdan sonra i‘lâm ve inhâ-yı mezkûr vâkıma mutâbık ve mâ-i mezkûr Gökdere nâm nehr-i cârîden oluk ile ifrâz ve icrâ olunduğuna binâen sakab-ı mezkûrun tevsî‘ ve tazyîk olunması husûsunda âhar kimesneye mazarratı olmayıp eyyâm-ı şitâda mikdâr-ı kifâye ve eyyâm-ı sayfda alâ-tarîkı’l-münâvebe ehl-i İslâm ve tâife-i mersûmenin menâzillerine icrâsıyla tarafeyn muzâyakadan vâreste olacakları Der-aliyye’de müsâfiren sâkinûn Bursa ahâlîsinden ve erbâb-ı vukūfdan Mustafa b. Mehmed ve İbrahim b. Mehmed ve Ahmed b. Süleyman nâm kimesnelerin haberleriyle zahir olmağla vech-i meşrûh üzere istid‘âlarına müsâ‘ade-i seniyye erzânî buyurulup mukaddemâ sâdır olan emr-i şerîfin kaydı bi’t-terkīn i‘lâm-ı hâli mutazammın tâife-i mersûmûn yedlerine müceddeden bir kıt‘a emr-i âlîşân ısdârı menût-ı re’y-i âlî idüğü huzûr-ı [âlîlerine i‘lâm olundu]. Fî 17 M sene [12]54.