Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 79 Hüküm no: 46 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yalakabad ahalisinden Ahsabet’in menzilini işgal eden Turfanda Nasraniye ile Yalakabad’da muhakeme olunmaları Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Yalakâbâd kazâsına tâbi‘ Kangırı karyesi mütemekkinelerinden sâhibe-i arzuhâl Ahsabet nâm Nasrâniyenin karye-i mezkûrede kâin mütemekkine olduğu bir bâb mülk menzil için yine karye-i merkūme mütemekkinelerinden Turfanda nâm Nasrâniye menzil-i mezkûrda benim dahi hissem vardır diyerek müdâhale ve menzil-i mezkûru fuzûlî zabt etmiş olduğu beyânıyla Nasrâniye-i mesfûrenin vâki‘ olan müdâhalesi men‘ ü def‘ olunması bâbında mersûme Ahsabet Nasrâniye bir kıt‘a fermân-ı âlîşân sudûrunu istid‘â eylediği meâl-i arzuhâlden müstebân ve husûs-ı mezkûr hukūk-ı şer‘iyyeden olduğuna binâen tarafeyn bi’l-muvâcehe terâfu‘-i şer‘-i şerîf olunmağa muhtâc olup ve mesfûre Turfanda Nasrâniye el-yevm karye-i mezbûrede mütemekkine olmağla tarafeyn bi’l-muvâcehe mahâllinde terâfu‘-i şer‘-i şerîf ve ihkāk-ı hak olunmak bâbında Yalakâbâd kazâsı nâibine hitâben bir kıt‘a fermân-ı âlîşân sudûru iktizâ eylediği huzûr-ı âlîlerine i‘lâm olundu. El-emru limen-lehü’l-emr. Fi’l-yevmi’s-sâbi‘ aşer min-şehri Rebî‘ülevvel li-sene erba‘a ve hamsîn ve mi’eteyn ve elf.