Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 79 Hüküm no: 47 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey ve Molla Salih’in Edirnelizade Mehmed’in mirasından dolayı Hüseyin ile muhakemeleri Ma‘rûz, Sâdır olan fermân-ı âlîlerine imtisâlen işbu arzuhâl ve derkenâr merbût olup mahrûse-i Bursa nâibi esbak Şerif Ahmed Efendi dâ‘îlerinin mührü mutâbık bir kıt‘a i‘lâma nazar olundukda mahrûse-i mezbûre mahâllâtından Şekerhoca mahallesi sükkânından olup bundan akdem vefât eden Edirnelizâde el-Hâc Mehmed Ağa b. Ali’nin verâseti zevce-i menkûha-i metrûkesi Şerife Selime bt. Mehmed ile li-ebeveyn birâderzâdeleri Ali Bey ve Salih Molla ibney-i İbrahim’e münhasıra ba‘dehu zevce-i mezbûre Şerife Selime dahi vefât edip verâseti li-ebeveyn ammetesi Şerife Hüsniye bt. Mustafa’ya münhasıra ba‘dehu mezbûre Şerife Hüsniye dahi vefât edip verâseti sadrî evlâdı es-Seyyid el-Hâc Hüseyin ve Şerife Sıdıka’ya ba‘de’l-inhisâr mezbûrân Ali Bey ve Salih Molla’dan her biri mûrisleri ammileri müteveffâ-yı evvel-i mezbûr el-Hâc Mehmed Ağa’nın zevcesi müteveffât-ı sâniye-i mezbûre Selime Hatun’un terekesine bi’l-verâse vaz‘-ı yedleri mütehakkık olan kendiden asıl ve kız karındaşı mezbûre Şerife Sıdıka tarafından tasdîka vekîl-i şer‘îsi mezbûr es-Seyyid el-Hâc Hüseyin’den sene-i sâbıkā Şa‘bânü’l-mu‘azzamı’nın yirmi üçüncü günü mahrûse-i mezbûre mahkemesinde huzûr-ı hâkimü’ş-şer‘de da‘vâ ve ber-nehc-i şer‘î isbât ve ba‘de’t-tahlîf ve’l-hükm merkūmân Ali Bey ve Salih Molla meblağ-ı mahkûmün-bih-i mezkûr on beş bin guruş hisse-i irsiyelerinden mezbûr el-Hâc Hüseyin ile sekiz bin guruş üzerine sulh olup ve bedel-i sulh-ı mezkûrun iki bin guruşunu bi’l-verâse kabz ve bâkī altı bin guruşun dahi târîh-i mezkûrdan altmış bir gün tamâmında edâ etmek üzere mezbûr el-Hâc Hüseyin’i te’cîl eylediklerinde ol dahi kabûl ve ber-vech-i muharrer edâya ta‘ahhüd etmiş ve ecel-i mezkûr hulûlünden sonra bedel-i sulh-ı bâkī-i mezkûr altı bin guruşu mümâtale ile mezbûrân Ali Bey ve Salih Molla’ya teslîm etmemiş ve ba‘dehu mezbûr el-Hâc Hüseyin müteveffâ-yı evvel-i mezbûr el-Hâc Mehmed’in zevcesi müteveffât-ı sâniye-i mezbûre zimmetinde bir akçe ve bir habbe alacağı yokdur diyerek mahâllinde şer‘le rü’yet olunmasını hilâf-ı inhâ bâ-arzuhâl istid‘âsına mebnî husûs-ı mezkûr mahâllinde şer‘le rü’yet olunması bâbında işbu sene-i mübâreke evâhir-i Muharremi’l-harâmında emr-i âlî sudûr etmiş olduğu meâl-i istid‘â ve derkenâr ve i‘lâm-ı mezkûrdan müstebân olup ancak husûs-ı mezkûr târîh-i merkūmdan huzûr-ı hâkimü’ş-şer‘de şer‘le rü’yet ve fasl ü hasm olunmuş ve ba‘dehu emr-i âlî-i mezkûr fakat mezbûr el-Hâc Hüseyin’in hilâf-ı vâki‘ istid‘âsıyla sudûr etmiş olmağın bu sûretde mazmûn-ı i‘lâm-ı mezkûr mahâllinde hasmı muvâcehesinde huzûr-ı şer‘de isbât olunarak bedel-i sulh-ı bâkī-i mezkûr altı bin guruşu mezbûr el-Hâc Hüseyin’den tahsîl ve merkūmân Ali Bey ve Salih Molla’ya teslîmi bâbında emr-i âlî-i mezkûrun kaydı terkīn ve bâlâsına şerh verilerek hâlâ mahrûse-i Bursa nâibi fazîletlü efendi dâ‘îlerine hitâben tekrâr bir kıt‘a fermân-ı âlîşân sudûru iktizâ eylediği huzûr-ı âlîlerine i‘lâm olundu. El-emru li-men-lehü’l-emr. Fî 29 Ca sene 1254.