Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 82 Hüküm no: 51 Orijinal metin no: [9b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Voyvoda Ali’nin vefat eden Eteklizade Ali’de olan alacağının varislerinden tahsili Ma‘rûz, <> Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Biga sancağının hâvî olduğu kazâlardan Ezine-i Kazdağı kazâsı ahâlîsinden Eteklizâde Ali Bey nâm kimesne iki yüz kırk dokuz senesi hilâlinde kazâ-i mezkûr voyvodası bulunan es-Seyyid Ali nâm kimesnenin uhde-i iltizâmında bulunmuş olan kazâ-i mezkûr dâhilinde Akçaköy nâm mahâlde vâki‘ boz, hâlî ve mahlûl olan ma‘lûmü’l-kıt‘a arazi ve üzerlerinde mevcûd ma‘lûmü’l-aded palamut eşcârını on bin guruş resm-i tapu ile voyvoda-i mûmâ-ileyhden ba‘de’t-tefevvüz resm-i tapu-yı mezkûru peşînen vermeyip zimmetinde deyni olduğunu nâtık karz unvânıyla voyvoda-i mûmâ-ileyh yedine bir kıt‘a temessük i‘tâ etmiş ve mezbûr Ali Bey meblağ-ı mezkûr on bin guruşu voyvoda-i mûmâ-ileyhe kable’l-edâ ve’l-îfâ verâseti kazâ-i mezkûrda sâkinler zevce-i menkûha-i metrûkesi Âişe ve vâlidesi Fâtıma hatunlar ile sulbî sagīr oğlu Osman’a münhasıra olduğu hâlde bundan akdemce fevt olmuş olmağla meblağ-ı mezkûr voyvoda-i mûmâ-ileyh yedinde olan fetvâ-yı şerîfeler mantûklarınca müteveffâ-yı mezbûrun tereke-i vâfiyesinden tahsîli bâbında voyvoda-i mûmâ-ileyh bir kıt‘a fermân-ı âlîşân sudûru niyâzında olduğu meâl-i arzuhâl-i mezkûrdan müstebân olmağla bu sûretde verese-i merkūmûn el-yevm kazâ-i mezkûrda sâkinler olmalarıyla tarafeyn bi’l-muvâcehe mahâllinde terâfu‘-i şer‘-i şerîf ve ihkāk-ı hak olunması bâbında hâlâ kazâ-i mezkûr hâkimi ve voyvodasına hitâben bir kıt‘a fermân-ı âlîşân sudûru iktizâ eylediği huzûr-ı âlîlerine i‘lâm olundu. El-emru li-hazreti men-lehü’l-emr. Fi’l-yevmi’s-sâdis ve’l-ışrîn min Recebi’l-ferd li-sene erba‘a ve hamsîn ve mi’eteyn ve elf.