Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 83 Hüküm no: 52 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokat’ta vakıf iki dükkânın menkul hükmünde olan bağ çubukları ve ağaçlar ile değiştirilemeyeceği Ma‘rûz, Sâdır olan fermân-ı âlîlerine imtisâlen vilâyet-i Anadolu’da hâlâ medîne-i Tokad nâibi es-Seyyid Mehmed Ârif Efendi dâ‘îlerinin işbu mühri mutâbık i‘lâmında tahdîd ve tavsîf ve beyân olunduğu üzere iki bâb vakıf ipekçi ve iplikçi kârhâneleri kürûm ve eşcârı mülk bir kıt‘a bağ ve bahçe ve kürûm ve arsası mülk bir kıt‘a bağ ile istibdâl olunarak zımnında ve bâlâsı tuğrâ-yı garrâ ile mu‘anven izn-i hümâyûnu nâtık bir kıt‘a emr-i âlî sudûru niyâz ve istirhâm olunmuş olup lâkin vakıf olan kârhâne-i mezkûrelere bedel olmak üzere verilecek bağ ve bahçe ve diğer bir kıt‘a bağdan ibtidâ zikr olunan bağ ve bahçenin ancak kürûm ve eşcârı mülk olduğu zikr olunup arsası ne makūle idüğü zikr olunmayıp üzerlerinde mağrûs kürûm ve eşcâr menkūl hükmünde olmağla bu sûretde vakıf akārın bu makūle menkūl ile istibdâli meşrû‘ olmadığı ma‘lûm-ı devletleri buyuruldukda ol bâbda fermân hazret-i veliyyü’l-emrindir.