Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 83 Hüküm no: 53 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menemen kazası ahalisinden vefat eden Hasırcızade Osman Ağa’nın terekesi hususundaki davanın görülmesi Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Saruhan <> sancağında Menemen kazâsına tâbi‘ Miralem karyesinde sâkin iken verâseti zevce-i metrûkesi Hadice bt. Mehmed ile sulbî kebîr oğulları Ali ve Mehmed ve sulbî sagīr oğulları Osman ve Ârif ve sulbiye kebîre kızı Şerife ve sulbiye-i sagīre kızları Hadice ve Fâtıma’ya münhasıra olduğu hâlde bundan akdem fevt olan Hasırcızâde Osman Ağa’nın zâhire ihrâç olunan terekesi hâlâ kazâ-i mezbûr nâibi es-Seyyid Mehmed Naim Efendi tahrîr ve beyne’l-verese taksîm edmiş ise de müteveffâ-yı mezbûrun zevcesi mezbûre Hadice tereke-i müteveffâ-yı mezkûrdan hâric-ez defter-i kassâm ba‘zı eşyâsını fuzûlî müstakılleten ahz kabz ve ketm [ve] ihfâ edip husûs-ı mezkûr için nâib-i mezbûr huzûrunda zevce-i mezbûre ile lede’t-terâfu‘ nâib-i merkūm zevce-i mezbûreyi istishâb ile eşyâ-i mezkûrenin hârice ihrâcı husûsuna dikkat ve ihtimâm etmediğinden verese-i sâireye gadr-ı küllî olacağından bahisle eşyâ-i mezkûre için zevce-i mezbûre ile kazâ-i mezkûr civârında kâin medîne-i Manisa nâibi efendi dâ‘îleri huzûrunda terâfu‘-i şer‘-i şerîf ve ihkāk-ı hak olunmak bâbında bir kıt‘a fermân-ı âlîşân sudûru istid‘â olunduğu meâl-i arzuhâlden müstebân olmağla bu sûretde ber-vech-i meşrûh fermân-ı celîlü’ş-şân sudûru işâret-i aliyye-i hazret-i fetvâ-penâhîye muhtâc idüğü huzûr-ı âlîlerine i‘lâm olundu. El-emru li-men-lehü’l-emrindir. Fî 25 Ş sene [1]254.