Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 84 Hüküm no: 54 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’den boşalan tımarın tevcihi ile ilgili davanın yeniden görülmesi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Hüdâvendigâr sancağında vâki‘ Beypazarı nâhiyesinde nısf Celeblü nâm karyeden dört bin yedi yüz altmış akçe eşkincilü mülk timâra mutasarrıf olan Mehmed v. İbrahim bundan akdem fevt oldukda timâr-ı mezkûr müteveffâ-yı mezbûrun fevtinden iki yüz kırk beş senesi Muharremi’l-harâmı’nın yirmi ikinci günü sulbiye sahîha kızları Havva ve Müntehâ ve Emine’ye ber-vech-i iştirâk tevcîh ve berât olundukdan sonra ecânibden müteveffâ Mehmed’in evlâdı Mahmud [ve] Emine’den her biri babaları ismi merkūmât Havva ve Müntehâ ve Emine’nin babaları ismine mutâbıkı olmak cihetiyle timâr-ı mezkûru babamız nân pâresidir diyerek mezbûrât Havva ve Müntehâ ve Emine’nin üzerlerinden bir takrîb ref‘le babaları müteveffâ-yı merkūm diğer Mehmed’in mahlûlünden olmak zu‘muyla sene-i sâbıkā Zilka‘deti’ş-şerîfesi’nin on ikinci günü merkūmât Havva ve Müntehâ ve Emine’nin ref‘lerinden fuzûlî kendü üzerlerine tevcîh ve berât etdirmiş olduklarına binâen mezbûrât Havva ve Müntehâ ve Emine timâr-ı mezkûr babaları müteveffâ-yı mezbûrun fevtinden ve merkūmân Mahmud ve Emine’nin ref‘lerinden yine kendü üzerlerine ber-vech-i iştirâk tekrâr tevcîh ve yedlerine bir kıt‘a berât-ı âlîşân sadaka ve ihsân buyurulması istirhâmında oldukları meâl-i i‘lâmdan müstebân ve fi’l-hakīka mezbûrât Havva ve Müntehâ ve Emine müteveffâ-yı mezbûr Mehmed v. İbrahim’in sulbiye-i sahîha kızları olduğu bî-garaz Müslimînden ve nâhiye-i mezbûr ahâlîsinden olup İstanbul’da Acımusluk Medresesi’nde sâkin talebe-i ulûmdan Hafız Mehmed Efendi b. Mehmed ve Asâkir-i harbiye-i taburunun ikinci bölüğünün ikinci onbaşısı İbrahim Ağa b. Mahmud ve Abdullah b. Hasan nâm kimesnelerin meclis-i şer‘de alâ-tarîkı’ş-şehâde haberlerinden zâhir ve âyan olmağla timâr-ı mezkûr müteveffâ-yı mezbûr Mehmed v. İbrahim’in fevtinden ve merkūmân Mahmud ve Emine’nin ref‘lerinden mezbûrât Havva ve Müntehâ ve Emine üzerlerine ber-vech-i iştirâk tevcîh ve yedlerine bir kıt‘a berât-ı âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. El-emru li-men-lehü’l-emr. Fi’l-yevmi’s-sâlis min Zilka‘deti’ş-şerîfe sene erba‘a ve hamsîn ve mi’eteyn ve elf.