Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 86 Hüküm no: 56 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çemişkezek ahalisinden Halil’in Safiye Hatun’un mirası hususunda davası Ma‘rûz-ı dâ‘îleridir ki, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Çemişkezek kazâsına tâbi‘ Vartanik karyesinde sâkine iken [bin] iki yüz on dört senesi hilâlinde vefât eden Safiye Hatun hâl-i hayatında karye-i merkūme toprağında vâki‘ mutasarrıfe olduğu emlâkini torunu olup sâhib-i arzuhâl Halil’in, ammisi kazâ-i mezkûr voyvodası esbak Karahötekzâde? Ahmed Bey’in kerîmesine temlîk ve teslîm eyledikden sonra müteveffât-ı mezbûre Safiye Hatun’un vârisleri Halil ve Abdullah otuz beş sene müddet mîr-i merkūmdan mîrâs iddi‘â eylemediklerinden mâ‘adâ merkūmân Halil ve Abdullah dahi otuz dokuz senesi hilâllerinde birbirini müte‘âkiben fevt olduklarında sulbî oğulları Mehmed ve diğer Mehmed’den her biri dahi beş sene müddetden beri müteveffât-ı mezbûrenin terekesini mîr-i merkūmdan da‘vâ etmeyip bu müddetlerde tereke-i müteveffât-ı mezbûreye kat‘an müdâhale olunmamış iken mezbûr Ahmed Bey’in işbu sene-i mübârekede fevt olup bi’l-cümle muhallefâtı cânib-i mîrîden ba‘de’z-zabt vârisi sâhibe-i arzuhâl mezbûra bâ-irâde-i seniyye inâyet ve ihsân olundukdan sonra mezbûrân Mehmed ve diğer Mehmed bu def‘a müteveffâ-yı mezbûr Ahmed Bey’in terekesine bi-gayr-ı hakkın müdâhale ve emlâk-ı mezkûreyi mutâlebe eylediğine binâen merkūmânın vâki‘ olan müdâhalelerinin men‘ ü def‘i için hâlâ Sivas sancağı müşîri devletlü Hafız Paşa hazretlerine hitâben sâhib-i arzuhâl-i mezbûr bir kıt‘a fermân-ı âlîşân i‘tâ buyurulması niyâzında olduğu meâl-i istid‘âdan müstebân olmağın fi’l-hakīka on beş sene bilâ-özr terk olunan da‘vânın bilâ-emr istimâ‘ı memnû‘ ise de ancak tarafeyn bir beldede sâkinler olarak minvâl-i muharrer üzere mürûr-ı zamân vâki‘ olmuş mudur yâhud olmamış mıdır tarafeyn bi’l-muvâcehe mahâllinde terâfu‘a muhtâc olmağla bu sûretde merkūmân Mehmed ve diğer Mehmed ile sâhib-i arzuhâl merkūm mahâllinde bi’l-muvâcehe terâfu‘-i şer‘-i şerîf birle ihkāk-ı hak olunmak bâbında müşîr-i müşârün-ileyh hazretleriyle livâ-i mezkûr hâkimine hitâben bir kıt‘a fermân-ı âlîşân sudûru menût-ı re’y-i âlîleri idüğü huzûr-ı âlîlerine i‘lâm olundu. El-emru li-veliyyü’l-emr. Fi’l-yevmi’l-hâdî ve’l-ışrîn min-Zilka‘deti’ş-şerîfe li-sene erba‘a ve hamsîn ve mi’eteyn ve elf.