Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 93 Hüküm no: 95 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Todoraki’nin bağını Acem Markar’a sattığı Kartal kazâsında mütemekkin Aci Todoraki v. Sofiyanoz zimmî meclis-i şer‘-i hatîrde işbu râfi‘ü’r-rakīm Acem Markar v. İstefan zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin yedimde mülküm olup vakıf toprağında Yel değirme[ni] kurbünde vâki‘ etrâf-ı erba‘ası İmam Hacı Mustafa veresesi tarlası ve Karamürsellioğlu Yanaki veresesi bağı ve tarîk-i âm ile mahdûd tahmînen iki dönüm kürûmî mülk bir kıt‘a dut ve çavuş bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūm Markar zimmîye otuz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve kabûl edüp meblağ-ı mezkûr otuz guruşu müşterî-i merkūm yedinden bi’t-tamâm ve’l-kemâl ahz ü kabz eyledim fîmâ-ba‘d zikri mürûr eden bağda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşterî-i merkūm Markar zimmînin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min-şehri Rebî‘i’l-âhir li-sene ihdâ ve semânîn ve mi’ete ve elf. Şuhûdü’l-hâl: Osman Ağa, Voyvoda Ahmed Ağa, Molla Hüseyin Ağa, Kara Ahmed b. Mehmed, Ahmed Efendi. Kahveci? Pilo v. Rasi, Kostandi v. Yorgaki, Artin v. Yagop Demirci Toros, Ohan v. Marat zimmî