Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 88 Hüküm no: 58 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konya’da Şeyh Ahmed Hamamı su gideri hususunun Konya mahkemesince karara bağlanması Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da medîne-i Konya’da kâin Şeyh Ahmed Hamamı demekle meşhûr bir bâb hamamın çirkâbı medîne-i merkūme mahâllâtından Türbe mahallesi derûnunda vâki‘ cereyân eden ırmağa cârî olup lâkin bir müddetden beri zikr olunan çirkâbın mecrâsı âhar mahalle naklolunmuş ve sâlifü’z-zikr Türbe mahallesinden cereyân eden ırmağa kat‘â mazarratı yoğiken mahalle-i merkūme ahâlîleri sâlifü’l-beyân çirkâb yine evvelki mahâlline cârî olmağla mecrâsı âhar mahalle naklolunsun deyü her biri fuzûlî müdâhale etmeleriyle vâki‘ olan müdâhaleleri men‘ ü def‘ olunması bâbında işbu sâhib-i arzuhâl es-Seyyid Mustafa nâm kimesne bir kıt‘a fermân-ı âlîşân sudûrunu istîd‘â eylediği meâl-i arzuhâlden müstebân ve husûs-ı mezkûr hukūk-ı şer‘iyyeden olduğuna binâen ahâlî-i mahalleden el-yevm medîne-i mezkûrede sâkinler olmalarıyla tarafeyn bi’l-muvâcehe mahâll-i nizâ‘ üzerinde ber-nehc-i şerîf terâfu‘-i şer‘-i şerîf olunması bâbında medîne-i Konya nâibine hitâben bir kıt‘a fermân-ı âlîşân sudûru menût-ı re’y-i âlîleri idüğü huzûr-ı âlîlerine i‘lâm olundu. El-emru li-men-lehü’l-emrindir. Fî 17 Z sene [1]254.