Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 91 Hüküm no: 110 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazinedarbaşı Pîrî Ağa ile Cafer b. Abdullah arasında ihtilaf konusu olan evin Pîrî Ağa’ya ait olduğu Kaziyye-i Pîrî Ağa Vech-i tahrîr-i sicil budur ki Havâss-ı Kostantiniyye-i mahmiyyeye tâbi‘ Beşiktaşı nâm karyede sâkin Cafer b. Abdullah ve Şems Hatun cânibinden Ali b. Mehmed ve Mehmed b. Veli şehâdetleriyle vekâleti sâbit olan Yusuf b. Abdullah nâm kimesne meclis-i şer‘-i şerîfe ve mahfil-i hükm-i münîfe reisü’l-hazâîni’l-Bîrûnî Pîrî Ağa b. Abdullah nâm kimesneyi ihzâr ettikde da‘vâ kılıp karye-i mezkûrede tarîk-i âmm ve Kalender Çelebi ve kefere mezârlığı hudûduyla mahdûd olan evimi Hacı Kadın demekle ma‘rûf bir hatundan iki bin akçeye bey‘ etmiş idim hâliyâ mezbûr Pîrî Ağa beni mülkümden çıkarıp bana zulm edip elimden almak ister deyicek mezbûr Pîrî Ağa’dan suâl olundukda hudûd-ı mezkûr ile mukayyed olan evi Bâli oğlu Abdi’den cümle benim yedimde olan mülk ile ki sınırı bir taraf tarîk-i âmm ve bir taraf kefere mezârlığı ve bir taraf Kalender Çelebi ve bir taraf imâm müezzine meşrût hudûd ile Hayreddin Paşa Vakfı’na on bin akçeye rehin komuş idi müddet-i örfiyyesi tamâm oldukdan sonra bana on beş bin üç akçeye bey‘ edip vakfa deynini edâ edip bana mebî‘-i mesfûr teslîm etti bile satın aldım hudûdumda dâhil-i mülkümdür hüccetim vardır deyicek mezbûr Pîrî Ağa’dan beyyine taleb olundukda udûl-i müslimînden Üstâd Veli b. Ömer el-hayyât ve Ferhad b. Abdullah nâm sipâhî takrîrine muvâfık şehâdet edip hudûd-ı mezkûr ile mukayyed olan ev Pîrî Ağa Hayreddin Paşa rehninde iken satın aldı hudûdunda dâhil-i mülküdür şâhidiz şehâdet ederiz deyicek mezbûr şâhidân-ı mezkûrânın şehâdetleri hayyiz-i kabûlde vâki‘ olup mezkûr ev Pîrî Ağa’ya hükm olunup talebiyle bu vesîka ketb olunup sûret yed-i talibe def‘ olundu. Tahrîren fî evâhir-i Zilhicce sene 966 Şuhûdü’l-hâl: Mevlânâ Pîr Mehmed b. Mehmed el-mülâzim an fahrü’l-akrân Belderzâde Efendi ve Mevlânâ Ali b. Veli min telâmîzi Mehmed Çelebi el-ma‘rûf bi-Hoca Kubad, Mehmed b. Hamza el-ma‘rûf bi-Kalender Çelebi, Mahmud b. Abdullah sipâhî, Mehmed b. Ali sipâhî, Hüseyin b. Abdullah, Şeyh Mehmed b. Şeyhzâde, Mehmed b. Veli ve Mahmud Dede, Şaban b. Yusuf, Cafer Halîfe b. Sırrı el-imâm-ı mahalle-i mezbûre, Baba Ali Abdullah, Yahya Bey b. Baba Mehmed, Mehmed b. Mustafa ve gayruhüm mine’l-hâzırîn.