Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 89 Hüküm no: 60 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turhal ahalisinden Mustafa ile kayınbiraderleri arasındaki bağ davası Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen Anadolu’da vâki‘ Tokad kazâsına muzâfe Turhal kasabası ahâlîsinden sâhib-i arzuhâl Mustafa nâm kimesne bundan akdem kazâ-i mezkûr mahkemesi muhzırânından Osman ve diğer Mustafa’nın kız karındaşları Fâtıma nâm hatunu tezevvüc eylediği esnâda mezbûr Mustafa’nın ceddesi Meryem nâm hatun kasaba-i mezkûre toprağında kâin mâlike olduğu eşcâr-ı müsmire ve gayr-ı müsmireli bir kıt‘a mülk bağını mezbûrân Osman ve diğer Mustafa’ya verip ba‘dehu merkūme Meryem zikr olunan bağı mezbûrân Osman ve diğer Mustafa’dan ben size zikri mürûr eden bağı kız karındaşları merkūme Fâtıma’yı torunu mezbûr Mustafa’ya tezvîc etdirmek üzere nefisleri için verdim deyü da‘vâ ve terâfu‘-i şer‘ olunarak bağ-ı mezkûru geri ahz ve zabt etmiş ise de yine merkūmân Osman ve diğer Mustafa bağ-ı mezkûru bir takrîb zabt eylediklerinden bahisle ceddesi mezbûre dahi fevt olmuş olmağla zikri mürûr eden bağı merkūmândan taleb ve terâfu‘-i şer‘-i şerîf olunmaları bâbında Sivas müşîri devletlü Paşa hazretlerine ve nâibi efendi dâ‘îlerine hitâben bir kıt‘a emr-i âlî sudûrunu istid‘â eylediği işbu arzuhâli meâlinden müstebân olmağla fi’l-hakīka husûs-ı mezkûr terâfu‘-i şer‘-i şerîfe muhtâc mevâddan olmağla ber-mûceb-i istid‘â bir kıt‘a emr-i alîleri sudûru re’y-i rezîn-i isâbet-karînlerine menût idüğü huzûr-ı âlîlerine i‘lâm olundu. Fî 15 S sene [1]254.