Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 90 Hüküm no: 61 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biga ahalisinin Bahr-ı sefid Boğazı eski muhafızı Mehmed Raif Paşa’ya ödedikleri parayı geri istemeleri Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen işbu i‘lâm ve derkenâra nazar olundukda derûn-ı i‘lâmda muharrer husûsun ber-nehc-i şer‘-i şerîf rü’yet ve ihkāk-ı hakk olunmak babında bi’l-iltimâs bundan akdem Biga sancağı mutasarrıfı ve Bahr-ı sefîd Boğazı Muhâfızı atûfetlü Ali Paşa hazretlerine hitâben ısdâr olunan emr-i âlî mûcebince mahâllinde terâfu‘ ve ihkāk-ı hakk olunarak sûret verilmiş ve ahâlî-i karyenin derûn-ı i‘lâmda mezkûr meblağın muhâfız-ı esbak atûfetlü Mehmed Raif Paşa hazretlerinden istirdâdı niyâzında oldukları meâl-i istid‘âdan müstebân ve husûs-ı mezkûr muahharen livâ-i mezkûr mutasarrıfı olup hâlâ Serasker-i zafer-rehber devletlü Mehmed Said Paşa ve devletlü Vasıf Paşa hazretlerinin ma‘lûmât-ı müşîreyleri olduğu ihbâr kılınmağın bu sûretde husûs-ı mezkûr Serasker-i müşârün-ileyhin ma‘lûmât-ı müşîreyleri olduğundan taraf-ı müşârün-ileyhe mi havâle buyurulur yâhud mahâllinde şer‘le rü’yet olunmasına mı havâle buyurulur, her hâlde menût-ı re’y-i âlîleri idüğü huzûr-ı âlîlerine i‘lâm olundu. El-emru li-men-lehü’l-emr. Hurrire fi’l-yevmi’s-sâlis ve’l-ışrîn min-Saferi’l-hayr li-sene hamse ve hamsîn ve mi’eteyn ve elf.