Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 90 Hüküm no: 62 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih ve Mehmed Esad’ın eşkinci tımarından hisse talebleri Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Kocaeli sancağının hâvî olduğu kazâlardan İznik kazâsına tâbi‘ nefs-i Kürt ve gayrıdan beş bin dokuz yüz doksan dokuz akçe eşkincilü mülk Lala Şahin Paşa evlâdına mahsûs timârdan hisseye mutasarrıf olan ceddemiz Hadice bt. Rukiye fevt olup hisse-i mezkûreyi oğlu Ahmed ile kızları Arife ve Fâtıma ve Rukiye’ye kable’t-tevcîh vâlidemiz mezbûre Rukiye ve hâlitelerimiz mezbûretân Ahmed Ârif ve Fâtıma dahi müte‘âkiben fevt olup hisse-i mezbûreden vâlidemiz mezbûre Rukiye’ye isâbet eden hisseyi âdiyen üzerlerimize berât etdirmek murâd eylediğimizde müteveffiye-i mezbûre Fâtıma’nın oğlu derûn-ı arzuhâlde mezkûrü’l-ism Mehmed sizin vâlideniz Rukiye vâlidesi mezbûre Hadice’nin hayatında fevt olup ba‘dehu mezbûr Ahmed ve mezbûre Arife ile vâlidem merkūme Fâtıma fevt olmağla hisse-i mezkûre âdiyen bana intikāl eder deyü bizlere tevcîh ve timâr-ı mezkûra tasarrufa mümâna‘at ile gadr etmekle şürûtu ba‘de’l-ihrâc mümâna‘atı def‘le hisse-i mezkûreyi vâlidemiz mahlûlünden bizlere tevcîh olunması sâhibey-i arzuhâl merkūme Rukiye’nin sadrî oğulları Salih ve Mehmed Esad’dan her biri iltimâs eyledikleri meâl-i istid‘âdan ve hisse-i mezkûre el-yevm es-Seyyid İbrahim ve Şerife Âişe ve Şerife Hadice ve Şerife Âmine üzerlerinde olduğu kuyûddan müstebân olmağla bu sûretde sâhibey-i arzuhâl Mehmed Salih ve Mehmed Esad mahâllinde hisse-i sâire mutasarrıfları hâzır oldukları hâlde mezbûr Mehmed ile terâfu‘-i şer‘-i şerîf olunmak bâbında İznik nâibine hitâben bir kıt‘a emr-i âlî sudûru menût-ı re’y-i âlîleri idüğü huzûr-ı [âlîlerine i‘lâm olundu.] Fî 15 Ca sene [1]255.