Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 92 Hüküm no: 64 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’da mülk tımarın Hacı Mirza Bey Vakfı mütevellisi Fâtıma’ya tevcihi Hâlâ Revnak-efzâ-yı Sadr-ı Anadolu devletlü inâyetlü Yesârîzâde Mustafa İzzet Efendi hazretlerinin zamân-ı meymenet-efter-âyinlerinde vukū‘ bulan senedât-ı şer‘iyye kaydıdır. Fî-gurreti C sene [1]255. Ma‘rûz, Sâdır olan fermân-ı âlîlerine imtisâlen işbu arzuhâl ve hâmişinde mastûr derkenârlara ve Amasya Nâibi Şirânîzâde Abdullah Şakir Efendi’nin mührü mutâbık i‘lâmına nazar ve mütâla‘a olundukda Amasya sancağında Argoma [Suluova] nâhiyesinde vâki‘ Çameşuy? nâm karye ve gayrıdan üç bin yüz yetmiş akçe yazılı mülk timâr hissesine mutasarrıf Ahmed ve Abdulkadir ibneyi’l-müteveffâ es-Seyyid Mehmed Said ve Şerif Mehmed ve Garime ve Habibe evlâdi’l-müteveffâ es-Seyyid Mustafa’ya babaları müteveffiyân-ı mezbûrânın mahlûllerinden tevcîh ve berât olunup el-yevm hisse-i mezkûre mezbûrûnun üzerlerinde olduğu ve bu makūle mülk timârlardan hisseye mutasarrıf olanlar fevt olduklarında hissesi ecnebîye verilmeyip evlâdlarına ve evlâdları yoğise karındaş ve akrabalarına sâir emlâk misillü ricâl ve nisâya bi-hasebi’ş-şer‘ verilmek kānûn-ı kadîm olduğu, lâkin hisse-i timâr-ı mezkûr müteveffâ Mustafa b. el-Hâc Mirza Bey Vakfı’nın tevliyetine merbut olduğu kayıddan müstebân ve tevliyet-i mezkûre dahi el-yevm ber-vech-i evlâdiyet ve meşrûtiyet üzere bâ-berât-ı şerîf-i âlîşân Fâtıma bt. Mehmed nâm hatun uhde-i tasarrufunda olup ve mezbûreden gayrı evlâd-ı vâkıf olmayıp mezbûrûn ecânibden oldukları ve bu makūle mülk timârlar tevcîhi cebelüyân evkāf-ı emlâk mukāta‘ası ümenâlarının arz ve inhâlarıyla olageldiği nizamlarından idüğüne binâen iştirâken mühürleri mutâbık Emîn-i mukāta‘a-i cebelüyân Mehmed Şakir ve Osman ve İsmail’in arz ve inhâlarıyla hisse-i timâr-ı mezkûr merkūmûnun üzerlerinden ref‘ ve mezbûre Fâtıma’nın bi’l-meşrûta mutasarrıfe olduğu timâra ilhâk ve mezbûre Fâtıma üzerine tevcîh buyurulması müsterham idüğü müstebân olmağla bu sûretde ber-mûceb-i kānûn hisse-i timâr-ı mezkûr merkūmûnun ref‘lerinden ber-mantûk-ı arz ve inhâ mezbûre Fâtıma’ya tevcîhi re’y-i sâmîlerine menût idüğü huzûr-ı âlîlerine i‘lâm olundu. Bâkī el-emru li-men-lehü’l-emr. Fî 25 Za sene [1]255.