Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 93 Hüküm no: 66 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ethem’in kardeşleri Mustafa ve Fâtıma ile olan miras davası Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Hüdâvendigâr sancağına tâbi‘ İnegöl-i Bursa kazâsı ahâlîsinden Aşıkoğlu es-Seyyid el-Hâc İsmail Ağa nâm kimesne kazâ-i mezbûrda sâkin iken bin iki yüz on dokuz senesi hilâlinde fevt oldukda bi’l-cümle emvâl ve emlâk-ı metrûkesi verese-i münhasırası olup el-yevm kazâ-i mezbûrda sâkinler zevce-i menkûha-i metrûkesi Hadice Hatun ile sulbî kebîr oğulları sâhib-i arzuhâl es-Seyyid İbrahim Edhem ve Çelebi es-Seyyid Mustafa ve sulbiye kebîre kızı Şerife Fâtıma’ya mevrûs oldukdan sonra verese-i mezbûrûndan bint-i mezbûre Şerife Fâtıma bundan akdem nefsini âhara tezvîc ile babası müteveffâ-yı merkūmun terekesinden hisse-i irsiye-i ma‘lûmesini tereke-i müteveffâ-yı mezbûra bi’l-verâse vâzı‘u’l-yed olan karındaşım merkūm es-Seyyid İbrahim Edhem yedinden tamâmen kabz ve istîfâ-yı hakla bi’l-cümle hukūk-ı mîrâsa müte‘allika da‘vâdan karındaşı mezbûr es-Seyyid İbrahim Edhem’in zimmetini kabûlünü hâvî ibrâ ve iskāt edip ba‘dehu merkūme Şerife Fâtıma iki yüz otuz dört senesi hilâlinde karındaşı mezbûr es-Seyyid İbrahim Edhem’den hisse-i irsiye mutâlebesiyle mahâllinde huzûr-ı şer‘de bi’l-muvâcehe lede’t-terâfu‘ nesne lâzım gelmediği kıbel-i şer‘den kendüye tefhîm ve mezbûr es-Seyyid İbrahim Edhem’in yedine bir kıt‘a i‘lâm-ı şer‘î i‘tâ olunmuş ve merkūm es-Seyyid İbrahim Edhem diğer karındaşı mezbûr es-Seyyid Mustafa ile babaları müteveffâ-yı merkūmdan mevrûs mâl ve emlâklerini ifrâz etmeyip ber-vech-i iştirâk beynlerinde ibkā eylediklerinden sonra umûrlarına sekte ârızıyla yirmi bin guruşunu bi’l-münâsafe düyûna giriftâr olmalarıyla meblağ-ı mezkûr [12a] yirmi bin guruş ile merkūm es-Seyyid Mustafa’nın âhar ma‘lûmü’l-esâmî kimesnelere zimmetinde müstakıllen diğer deyni olan beş bin guruş ki cem‘an yirmi beş bin guruşu merkūm es-Seyyid Mustafa’nın hissesinde bi-şartı’r-rücû‘ emriyle mezbûr es-Seyyid İbrahim Edhem malından kırk üç senesi hilâlinde ashâb-ı düyûna tamâmen edâ ve teslîm eylediğinde mezbûr es-Seyyid Mustafa dahi meblağ-ı mezkûr yirmi bin guruşdan nısf hissesine isâbet eden on bin guruş ve diğer deyni olan meblağ-ı merkūm beş bin guruş ki cem‘an karındaşı mezbûr es-Seyyid İbrahim Edhem’e on beş bin guruş zimmetinde deyni mukābelesinde babası müteveffâ-yı merkūmdan müntakil hisse-i irsiyesinden keff-i yed etmiş iken mezbûr es-Seyyid Mustafa kız karındaşı merkūme Fâtıma ile bi’l-ittifâk bu def‘a mezbûr es-Seyyid İbrahim Edhem’in menzilinde sandığı derûnunda mahfûz bir-takrîb malından eşyâ-i ma‘lûmesiyle i‘lâm-ı mezkûru hufyeten ahz birle karındaşları mezbûr es-Seyyid İbrahim Edhem’den tekrâr hisse-i irsiye mütâlebesine kalkışmış oldukları beyânıyla mezbûrân es-Seyyid Mustafa ve Fâtıma ile mahâllinde bi’l-muvâcehe ber-nehc-i şer‘î terâfu‘-i şer‘-i şerîf ve ihkāk-ı hak olunması bâbında Gemlik kazâsı muhassılı bendeleriyle sâlifü’z-zikr İnegöl-i Bursa hâkimine hitâben fermân-ı âlîşân sudûrunu sâhib-i arzuhâl merkūm es-Seyyid İbrahim Edhem istid‘â etmiş olduğu meâl-i arzuhâlden müstebân olmağla ber-vech-i istid‘â fermân-ı âlîşân sudûru re’y-i rezîn-i isâbet-karîn-i âsafânelerine menût mevâddan idüğü huzûr-ı âlîlerine i‘lâm olundu. Fî 13 M sene [1]256.