.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 94
Hüküm no: 67
Orijinal metin no: [12a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mühtedi Ali’nin kardeşi Andon ile olan miras davasında anlaşma sağlanması

Ma‘rûz,

Sâhib-i arzuhâl mühtedî Ali b. Abdullah nâm kimesne bi’l-ma‘iyye rü’yete memûr Evkāf-ı hümâyûn müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı Hazret-i Fetvâ-penâhî’de ma‘kūd meclis-i şer‘-i münîrde li-ebeveyn hâli derûn-ı arzuhâlde mastûrü’l-ism Andon v. Mıgırdıç nâm zimmî muvâcehesinde nezâreti Hazîne-i celîle-i Evkāf’a mülhak evkāfdan Ali Ağa Vakfı’nın bi’l-meşrûta mütevellîsi Süleyman Ağa b. Salih hâzır olduğu hâlde anam olup medîne-i Üsküdar mahâllâtından Selami mahallesinde mütemekkin iken işbu târîhden iki ay mukaddem mahrûse-i Galata’da Tersâne-i âmire Kethüdâsı esbak Mustafa Bey’in konağında cemî‘ edyân-ı bâtıladan teberrî ve ityân-ı kelimeteyn-i şehâdeteyn edip şeref-i İslâmla müşerrefe ve talebiyle Âişe tesmiye olundukdan bir gün mürûrunda anam merkūme Âişe mahalle-i mezkûrede vâki‘ vakf-ı mezkûr musakkafâtından bâ-temessük-i mütevellî bi’l-icâreteyn müstakılleten mutasarrıfe olduğu ma‘lûmü’l-hudûd bir bâb menzil derûnunda mevcûde bi’l-cümle eşyâ-i ma‘lûmesini Müslim mahallesinde bir âhar menzile nakil esnâsında iken menzil-i mezkûrda Müslime olduğu hâlde füc’eten vefât edip ol vechile beynimizde şer‘an mâni‘-i irs mevcûd olmadığına binâen bi’l-cümle terekesi hasran bana mevrûs ve menzil-i mezkûre dahi âdiyen bana intikāl etmiş iken mersûm Andon zimmî anam müteveffât-ı merkūmeyi benim haberim olmaksızın bir takrîb âyin-i Nasârâ üzere kefere maşadlığına ilkā etdirdiğinden mâ‘adâ vâris olmak zu‘muyla menzil-i mezkûr derûnunda mevcûde bi’l-cümle terekesini ahz u kabz ve menzil-i mezkûru dahi bilâ-veled mahlûlünden olmak üzere cânib-i vakf-ı mezkûrdan icâre-i mu‘accele-i ma‘lûme ile istîcâr ve tesellüm birle bi-gayr-ı hakkın vaz‘-ı yed eder. Suâl olunup tereke-i müteveffât-ı mezbûre ile menzil-i mezkûrdan keff-i yed birle bana teslîme mersûm Andon zimmîye tenbîh olunmak bi’l-verâse matlûbumdur deyü da‘vâ eylediğimde ol dahi cevâbında eşyâ-i muharrere-i mezkûreyi bi’l-verâse kabzını ve menzil-i mezkûru minvâl-i muharrer üzere cânib-i vakf-ı mezkûrdan mahlûlen istîcâr edip el-yevm vaz‘-ı yedini ikrâr, lâkin kız karındaşı anam müteveffât-ı mezbûrenin ber-minvâl-i muharrer şeref-i İslâmla müşerrefe olduğunu külliyen inkâr, ol vechile beynimizde münâza‘ât-ı kesîre cereyân etmiş idi. El-hâletü hâzihî ben da‘vâ-yı mezkûreme kat‘an şâhidim olmayıp kavl-i mücerredimle nesne sâbit olmadığı kıbel-i şer‘-i şerîfden bana ba‘de’t-tefhîm ancak mersûm Andon zimmî rızâsıyla bana malından teberru‘an beş yüz guruş def‘ ü teslîm ve umûruma sarfla istihlâke emr eylediğinde ben dahi yedinden ahz u kabz ve emriyle umûruma sarfla istihlâk etmemle meblağ-ı müstehlek-i merkūmun istirdâdına ve bi’l-cümle beynimizde cereyân eden cemî‘ hukūk-ı şer‘iyyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz minvâl-i muharrer âharın ibrâsını kabûl eyledik deyü ikrâr ve tasdîkleri huzûr-ı âlîlerine i‘lâm olundu.

Fî 6 M sene [1]256.