|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 95 Hüküm no: 68 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hamile Emine’ye boşandığı eşi Mehmed Said Ağa’nın nafaka tahsisi
Ma‘rûz,
İstanbul’da Aksaray civârında Yusuf Paşa Çeşmesi kurbünde Kazgânî Sadi mahallesinde sâkine sâhibe-i arzuhâl zâtı mu‘arrefe Emine bt. Mehmed Ârif nâm hatun bâb-ı hazret-i Fetvâ-penâhî’de Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde zevc-i sâbıkı medîne-i Üsküdar’da vâki‘ Basmacı esnâfından derûn-ı arzuhâlde mezkûrü’l-ism Mehmed Said Ağa b. Hüseyin nâm kimesne muvâcehesinde mezbûr Mehmed Said Ağa ile mukaddemâ zevciyyet beynimizde kāime iken merkūmun firâşından hâsıla batnımda mevcûd tahmînen beş buçuk aylık hamlim olmağla vaz‘-ı haml ile iddetim münkaziye oluncaya değin nafakam için zevcim mezbûr üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde, ol dahi ba‘de’t-tasdîk mezbûre Emine Hatun’un vaz‘-ı haml ile iddeti münkaziye oluncaya değin nafakası için işbu târîh-i i‘lâmdan zevci merkūm Mehmed Said Ağa üzerine tarafeynin hâline nazaran ve vakt ü hâle göre kadr-ı ma‘rûf idüğü bi’l-ihbâr zâhir ve mütehakkık olan beher yevm yüz yirmişer akçe nafaka kıbel-i şer‘den farz ve takdîr olunup meblağ-ı mefrûz-ı mezkûru kendi nafaka ve sâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer merkūm Mehmed Said Ağa üzerine rücû‘a mezbûre Emine Hatun’a izin verildiği huzûr-ı âlîlerine i‘lâm olundu.
Fî 2 S sene [1]256.
|