.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 96
Hüküm no: 69
Orijinal metin no: [12b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Abdi Efendi’nin Bogos aleyhindeki alacak iddiasında anlaşma sağlanması

Ma‘rûz,

Medîne-i Üsküdar mahâllâtından Bulgurlu Mescid mahallesinde sâkin sâhib-i arzuhâl Abdi Efendi b. Osman nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde keresteci esnâfından derûn-ı arzuhâlde mastûrü’l-ism Bogos v. Kigork nâm zimmî muvâcehesinde mersûm Bogos zimmînin sulbî oğlu esnâf-ı merkūmeden kezâlik derûn-ı arzuhâlde ismi mastûr Nişan zimmî hâzır olduğu hâlde mesfûr Nişan zimmî zimmetinde bundan akdem malımdan ve yedimden iktirâz ve kabz ve umûruna sarfla istihlâk eylediği bin beş yüz guruş alacak hakkım olup medyûnum hâzır-ı mersûm deyn-i mezkûru ile cihet-i deyn-i şer‘îden beni ol mikdâr medyûnu babası mesfûr Bogos zimmî üzerine iki yüz elli dört senesi Recebi’l-ferdinin beşinci günü üçümüz bir meclisde hâzır olduğumuz hâlde havâle-i nakīde-i sahîha-i şer‘iyye ile havâle ve her birimiz havâle-i mezkûreyi kabûl etmemizle ol vechile mersûm Bogos zimmî zimmetinde alacak hakkım olan meblağ-ı muhâlün-bih-i mezkûr bin beş yüz guruşu mesfûr Bogos zimmîden hâlâ taleb ederim deyü da‘vâ eylediğimde ol dahi ber-vech-i muharrer ikrâr lâkin ben meblağ-ı muhâlün-bih-i mezkûr için müddet-i ma‘lûmede bilâ-devr-i şer‘î murâbaha nâmıyla oğlum hâzır-ı mersûm yediyle malımdan sana bin yüz altmış dokuz guruş medfû‘um olmağla meblağ-ı mezkûr bin yüz altmış dokuz guruş deyn-i meblağ-ı muhâlün-bih-i mezkûrumun ol mikdârına takās olundukda bâkī zimmetimde ancak üç yüz otuz bir guruş deynim kalmışdır deyü hâzır-ı mersûmun tasdîkiyle inkârıma mukārin beni def‘a tasaddî ve ol vechile beynimizde ba‘de vukū‘i’l-münâza‘a muslihûn tavassutuyla beynimiz ıslâh ve tanzîm olunup ben tasaddî eylediğim meblağ-ı muhâlün-bih-i mezkûr bin beş yüz guruş da‘vâmdan mersûm Bogos zimmî ile bi’t-tav‘ ve’r-rızâ bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden mersûm Bogos zimmî ile hâzır-ı mesfûr Nişan zimmînin zimmetlerini onlar dahi kezâlik husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i de‘âvâdan benim zimmetimi her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr bin guruş zimmetinde müdde‘î-i mezbûra sahîhan deyni olduğunu mersûm Bogos zimmî tâyi‘an ve kat‘iyyen ikrâr ü i‘tirâf etmeğin mûcebince bedel-i sulh-ı mezkûr bin guruşun müdde‘î-i merkūm Abdi Efendi’ye edâ ve teslîmiyle mesfûr Bogos zimmî ilzâm olunduğu huzûr-ı âlîlerine i‘lâm olundu.

Fî 8 S sene [1]256.