|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 97 Hüküm no: 70 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ali Ağa’nın vefat eden eşi Ayşe’nin mirasından dolayı üvey kızı Fâtıma aleyhindeki miras davasında anlaştıkları
Ma‘rûz,
Medîne-i Üsküdar’a muzâfe Kādı karyesinde sâkine iken bundan akdemce vefât eden Âişe bt. Abdullah nâm Hatun’un verâseti zevc-i metrûku Ali Ağa b. Mustafa nâm kimesne ile sulbiye kebîre kızı Fâtıma Hanım bt. el-müteveffâ Abdullah’a münhasıra ve tashîh-i meselesi dört sehmden olup sihâm-ı mezbûreden bir sehmi zevci merkūma ve bâkī üç sehmi farzan ve redden kızı merkūmeye isâbeti tahakkukundan sonra sâhib-i arzuhâl zevc-i merkūm Ali Ağa Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde derûn-ı arzuhâlde mezkûretü’l-ism bint-i merkūme Fâtıma Hanım tarafından husûs-ı âti’l-beyânda vekîl olduğu zât-ı mezbûreyi bi’l-ma‘rifeti’ş-şer‘iyye ârifân Berber Mehmed b. Mehmed ve İsmail b. Süleyman nâm kimesneler şehâdetleriyle ber-nehc-i şer‘î sâbit olan Mehmed Said Efendi b. Mustafa muvâcehesinde mûrisem zevcem müteveffât-ı mezbûrenin hîn-i vefâtında malı olup kızı müvekkile-i mezbûre Fâtıma Hanım’ın bi-gayr-ı hakkın fuzûlî ketb ü ihfâ ve istihlâk eylediği dört bin guruşa mu‘âdil iki yüz aded yirmilik altın ile mecmû‘u otuz beş bin yüz on beş guruş kıymetli bir altın sâ‘at ve bir elmaslıca altın bilezik ve bir elmas zihgîr ve on iki aded elmas iğne ve altın üzerine masnû‘ bir çift elmas küpe ve seksen miskāl inci ve bir Buhûrî şal ve yün memlû on iki minder ve on iki çuka mak‘ad ve kıtık memlû kırk sekiz çatma yasdık ve otuz elvân yorgan ve yün memlû on baş yasdığı ve penbe memlû on aded yüz yasdığı ve penbe memlû on beş şilte ve yün memlû sekiz döşek ve yirmi bir elvân çârşeb ve iki câmeşûy leğeni ve bir âbdest leğeni ve bir ibrik ve beş güğüm ve bir musluklu güğüm ve dört nühâs mangal ve iki kazgan ve ikisi kebîr ve beşi sagīr cem‘an yedi tencere ve iki kebîr ta‘âm sinisi ve on yedi sahan ma‘a kapak ve iki tâbe ve bir süzgeç ve bir kadayıf tepsisi ve bir kahve güğümü ve bir polat tepsi ve on iki tombak zarf ma‘a fincanın kıymet-i mezkûrelerinden ber-tashîh-i mezkûr hisse-i irsiyemi rebîbem müvekkile-i mezbûreye izâfetle vekîl-i mezbûr Mehmed Said Efendi’den bi’l-verâse taleb ederim deyü da‘vâ etdikde vekîl-i merkūm Mehmed Said Efendi dahi cevâbında müvekkile-i mezbûrenin yedinde olup sene-i sâbık Recebi’l-ferdi’nin yirmi birinci günü târîhiyle muvarraha sâbıkā Üsküdar kādısı mevâlî-i i‘zâmdan Manyasîzâde fazîletlü Lütfullah Efendi’nin imzâ ve hatemini hâviye işbu bir kıt‘a hüccet-i şer‘iyye mantûkunca müteveffâ-yı mezbûre Âişe Hatun hayatında ve kemâl-i sıhhatinde eşyâ-i memlûkesi olan fakat sekiz elvân yorgan ve üç döşek ve üç çârşeb ve sekiz minder ve üç basma mak‘ad ve on çatma yasdık ve on sahan ma‘a kapak ve bir sagīr sini ve bir tâbe ve iki leğen ma‘a ibrik ve bir câmeşûy leğeni ve bir güğümünü tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile kızı müvekkile-i mezbûre Fâtıma Hanım’a iki yüz elli guruşa bey‘ ü temlîk ve teslîm eylediğinde ol dahi ber-minvâl-i muharrer ba‘de’l-iştirâ ve’t-temellük ve’t-tesellüm semeni olan meblağ-ı merkūm iki yüz elli guruş mütâlebesine müte‘allika âmme-i da‘vâdan müvekkilem mezbûrenin zimmetini kabûlünü hâvî ibrâ ve iskāt edip ol vechile eşyâ-i muharrere-i mezkûre müvekkilem mezbûre Fâtıma Hanım’ın bâ-hüccet-i şer‘iyye emvâl-i müşterâtı ve hakk-ı sırfı olduğuna binâen bi-hakkın ahz ve istihlâk etmiş idi deyü beni def‘ ve mâ‘adâ ziyâde müdde‘âlarımı külliyen inkâr ve ol vechile beynimiz ıslâh ve tevfîk olunup ben tasaddî eylediğim da‘vâ-yı mezkûremden müvekkile-i mezbûreye izâfetle vekîl-i merkūm ile [13a] bi’t-tav‘ ve’r-rızâ dört yüz guruş üzerine sulh olduğumda ol dahi sulh-ı mezkûru bi’l-vekâle kabûl ve bedel-i sulh-ı merkūm dört yüz guruşu müvekkile-i mezbûrenin malından olarak çend rûz zarfında bana edâya müte‘ahhid olmağla bedel-i sulh-ı mezkûrdan mâ‘adâ zevce-i müteveffât-ı mezbûrenin kalîl ü kesîr [ve] celîl ü hakīr nükūd ve urûs ma‘lûm ve mechûl bi’l-cümle ismi mâl ıtlâk olunur terekesine ve hukūk-ı mîrâsa ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvi ve kâffe-i mutâlebâtdan rebîbem müvekkile-i mezbûre Fâtıma Hanım’ın zimmetini vekîl-i merkūm Mehmed Said Efendi dahi kezâlik zevcem müteveffât-ı mezbûrenin terekesine ve hukūk-ı mîrâsa ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan benim zimmetimi tarafeynden her birimiz ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın asâleten ve vekâleten ibrâsını kabûl eyledik dediğini vekîl-i mezbûr Mehmed Said Efendi tasdîk ve ber-vech-i meşrûh kabûlü hâvî ibrâ eylediğini ve ibrâdan istisnâ olunan bedel-i sulh-ı mezkûr dört yüz guruş müvekkilesi mezbûrenin zimmetinde müdde‘î-i merkūma sahîhan deyni olduğunu bi’l-vekâle tâyi‘an ve kat‘iyyen ikrâr ü i‘tirâf ve ber-vech-i muharrer müdde‘î-i mezbûr Ali Ağa’ya edâya ta‘ahhüd ve bu vechile kat‘-ı münâza‘a eyledikleri huzûr-ı âlîlerine i‘lâm olundu.
Fî 17 Ra sene [1]256.
|