.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 99
Hüküm no: 71
Orijinal metin no: [13a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Emine ve kızı Refia’nın vakıf menzil hisselerini satmaları

Ma‘rûz,

Medîne-i Üsküdar’da Bulgurlu nâm mahâlde sâkineler derûn-ı arzuhâlde isimleri mezkûre zâtları mu‘arrefeler Emine bt. el-Hâc Osman ve sadriye kebîre kızı Refia bt. el-Hâc Abdurrahman nâm hatunlar bi’l-ma‘iyye rü’yete memûr evkāf müfettişi mevâlî-i i‘zâmdan fazîletlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde hademe-i hümâyûndan muhrec medîne-i mezkûrede vâki‘ Basmahâne kâtibi sâhib-i arzuhâl Abdullah Efendi b. Mehmed Salih nâm kimesne muvâcehesinde nezâreti Hazîne-i celîle-i Evkāf’a mülhak evkāfdan merhûm Miftah Ağası Süleyman Ağa Vakfı’nın bi’l-meşrûta mütevellîsi Sandalcı Abdurrahim Ağa b. Mehmed Salih hâzır olduğu hâlde medîne-i mezkûre mahâllâtından Ahmed Çelebi mahallesinde Minkârî Türbesi karşısında kâin bir birine muttasıl mukaddemâ bir bâb menzil ve iki bâb menzil arsaları olup el-yevm birbirine mahlût olarak ma‘lûmü’l-hudûd ve’l-müştemilât bir bâb menzilin ebniye mahâlli şehriye altmış akçe icâre-i müeccele Hazîne-i celîle-i Evkāf’a mülhak evkāfdan Türkmân Ağası esbak merhûm el-Hâc Mehmed Ağa Vakfı musakkafâtından ve mâ‘adâ bahçe mahâllinin mahâll-i mu‘ayyeni senevî seksen akçe icâre-i müeccele ile merhûm Mahmud Ağa el-mensûbu ilâ-Câbiri’l-ensârî Vakf-ı şerîfi müstagallâtından ve mahâll-i mu‘ayyeni dahi şehriye otuz akçe icâre-i müeccele ile merhûm Mîr-i piyâde el-Hâc Mustafa Ağa Vakfı müstagallâtından ve kezâlik mahâll-i mu‘ayyeni şehriye otuz akçe icâre-i müeccele ile merhûm Miftah Ağası Süleyman Ağa Vakfı müstagallâtından olarak her biri bâ-temessük-i mütevellî bi’l-icâreteyn münâsafeten taht-ı tasarrufumuzda iken biz menzil-i mezkûrun sâlifü’l-beyân Miftah Ağası Süleyman Ağa Vakfı’ndan olan mahâll-i mu‘ayyeni yedimizde ibkā birle mâ‘adâ zikirleri mürûr eden Türkmen Ağası el-Hâc Mehmed Ağa ve Mahmud Ağa ve Mîr Piyade el-Hâc Mustafa Ağa vakıfları musakkafâtlarından olan mahâll-i ma‘lûmelerini gāib ani’l-meclis es-Seyyid Hafız Mehmed Efendi b. Mehmed’e bundan akdem bedel-i ma‘lûm ve makbûz mukābelesinde bâ-re’y-i mütevellî kat‘iyyen ferâğ ve tefvîz ve teslîm eylediğimizde ol dahi ba‘de’t-tefevvüz ve’t-tesellüm, ber-vech-i muharrer mutasarrıf olduğu evkāf-ı selâse-i mezkûreden olan mahâll-i mezbûreleri işbu arzuhâl hâmişinde mastûr derkenârlar mantûklarınca iki yüz kırk dokuz senesi Şevvâli’l-mükerremi’nin yedinci günü kezâlik bedel-i ma‘lûm ve makbûz mukābelesinde işbu merkūm Abdullah Efendi’ye bâ-re’y-i mütevellî kat‘iyyen ferâğ ve tefvîz ve teslîm eylediğinde, ol dahi tefevvüz ve tesellüm ve kabûl edip ol vechile menzil-i mezkûrun evkāf-ı selâse-i mezkûreden olan mahâll-i ma‘lûmeleri müstakıllen merkūm Abdullah Efendi’nin ve sâlifü’l-beyân Miftah Ağası Süleyman Ağa Vakfı’ndan olan mahâll-i mu‘ayyeni dahi münâsafeten bizim tasarrufumuzda iken merkūm Abdullah Efendi zikr olunan Miftah Ağası Süleyman Ağa Vakfı’ndan olan mahâll-i mu‘ayyeni bi-gayr-ı hakkın fuzûlî zabt ve tasarruf eder. Suâl olunup keff-i yed birle bize teslîme mezbûr Abdullah Efendi’ye tenbîh olunmak matlûbumuzdur deyü mütevellîsi hâzır-ı mezbûr Abdurrahim Ağa’nın tasdîkiyle da‘vâ eylediğimizde ol dahi cevâbında kaziyye minvâl-i muharrer üzere olduğunu ikrâr ü i‘tirâf ve merkūm Miftah Ağası Süleyman Ağa Vakfı’ndan olan mahâll-i mu‘ayyen-i mezkûrdan keff-i yed birle bize teslîme ta‘ahhüd etmiş idi. el-Hâletü hâzihî biz ber-minvâl-i muharrer münâsafeten mutasarrıfeler olduğumuz mârru’z-zikr Miftah Ağası Süleyman Ağa Vakfı’ndan olan mahâll-i mu‘ayyeni dahi bu def‘a sekiz yüz guruş bedel mukāvelesiyle merkūm Abdullah Efendi’ye mütevellîsi hâzır-ı mezbûrun re’yiyle kat‘iyyen ferâğ ve tefvîz ve teslîm eylediğimizde ol dahi tefevvüz ve tesellüm ve kabûl ve bedel-i merkūm sekiz yüz guruşu bize def‘ ü teslîm ve umûrumuza sarfla istihlâka emr eylediğinde biz dahi yedinden bi’t-tamâm ahz u kabz ve emriyle umûrumuza sarfla istihlâk etmemizle bi’l-cümle husûs-ı mezkûra ve ferâğ-ı merkūmda şart-ı müfside müdde‘âsına ve bedel-i müstehlek-i mezkûrun istirdâdına müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer [âhar]ın ibrâsını kabûl eyledik ba‘de’l-yevm menzil-i mezkûrun gerek ebniye ve gerek bahçe mahallerinde kat‘an alâka ve medhalimiz kalmayıp mecmû‘u merkūm Abdullah Efendi’nin dâhil-i havza-i tasarrufu ve hakk-ı müfevvezi olmuşdur deyü müdde‘iyyetân-ı mezbûretân Emine ve kızı Refi‘a hatunların bi’l-cümle takrîr-i meşrûhlarını mezbûr Abdullah Efendi ile mütevellî-i hâzır-ı merkūmdan her biri tahkīk ve tasdîk ve bu vechile kat‘-ı nizâ‘ eyledikleri huzûr-ı âlîlerine i‘lâm olundu.

Fî 20 Ra sene [1]256.