|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 100 Hüküm no: 72 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Şile’nin Dereseki köyünden Sucu Ahmed’in Sucu Mehmed Arif’e sattığı bargirleri geri alması ve bedelini iade etmesi
Ma‘rûz,
Medîne-i Üsküdar’a muzâfe Yoros nâhiyesine tâbi‘ Dereseki karyesi ahâlîsinden derûn-ı arzuhâlde mezkûrü’l-ism Sucu Ahmed b. Hasan nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde İstanbul’da Hasan Paşa Hanı kurbünde sâkin sâhib-i arzuhâl Sucu es-Seyyid Mehmed Ârif b. el-Hâc Halil nâm kimesne muvâcehesinde ben işbu târîh-i i‘lâm-ı şehrî Rebî‘ülevvelin ikinci günü malımdan sekiz re’s bârgirlerimi iki bin sekiz yüz elli guruş semen-i medfû‘ ve makbûza mezbûr es-Seyyid Mehmed Ârif’e bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl etmiş idi. El-hâletü hâzihî zikr olunan bârgirler mezbûr es-Seyyid Mehmed Ârif’in yedinde mevcûd olduğuna binâen merkūm es-Seyyid Mehmed Ârif ile bey‘-i mezkûru bi’t-terâzî beynimizde fesh ve ikāle etmemizle semen olmak üzere makbûzum olan meblağ-ı mezkûr iki bin sekiz yüz elli guruş ile nâhiye-i mezbûreye tâbi‘ Kâğıdhâne karyesinde kâin taht-ı icâremde olan bir kıt‘a çayırın mevcûd otunu mezbûre bey‘ etmek için semen nâmıyla merkūm es-Seyyid Mehmed Ârif’den peşînen makbûzum olan dokuz yüz elli guruş ki cem‘an üç bin sekiz yüz guruşu mezbûr es-Seyyid Mehmed Ârif’e ol dahi zikr olunan bârgirleri bana teslîm ve her birimiz âhar yedinden bi’t-tamâm ve’l-kemâl ahz u kabz etmemizle bi’l-cümle husûs-ı mezkûrlara müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü mukırr-ı müdde‘î-i mezbûr Ahmed’in bi’l-cümle takrîr-i meşrûhunu mezbûr es-Seyyid Mehmed Ârif tasdîk ve bu vechile kat‘-ı nizâ‘ eyledikleri huzûr-ı âlîlerine i‘lâm olundu.
Fî 11 Ra sene [1]256.
|