.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 101
Hüküm no: 73
Orijinal metin no: [13b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Saliha bt. Hasan’ın, Abdülhamid Ağa ve sairleri aleyhindeki alacak davasında anlaşma sağlanması

Ma‘rûz,

Medîne-i Üsküdar’a muzâfe Karamürsel kasabasında İsmail Ağa mahallesinde sâkin iken iki yüz kırk dokuz senesi Saferi’l-hayrı gurresinde vefât eden Kiracıbaşı Kaçaroğlu Hasan Ağa b. İsmail b. Abdullah’ın verâseti zevce-i menkûha-i metrûkesi Emine bt. Ebubekir nâm hatun ile sulbî kebîr oğlu olup zevce-i mutallakası Hafize Hatun’dan mütevellid Hüseyin ve sulbiye sagīre kızları olup zevce-i mezbûre Emine Hatun’dan mütevellideler Saliha nâm-ı diğer Fâtıma ve Kâmile nâm-ı diğer Emine ve Âişe nâm-ı diğer Cemile’ye münhasıra, ba‘dehu sagīre-i mezbûre Kâmile dahi vefât edip verâseti zevc-i metrûku Mehmed b. Ömer nâm kimesne ile vâlidesi mezbûre Emine Hatun ve li-ebeveyn kız karındaşları merkūmetân Saliha ve Âişe’ye münhasıra ba‘dehâ zevce-i mezbûre Emine Hatun dahi vefât edip verâseti sadriye kızları mezbûretân Saliha ve Âişe’ye münhasıra, ba‘dehâ mezbûre Âişe dahi vefât edip verâseti li-ebeveyn kız karındaşı mezbûre Saliha ile li-ebin er karındaşı merkūm Hüseyin’e münhasıra ve tashîh-i meselesi bi-hükmi’l-münâsahati’ş-şer‘iyye bin iki yüz seksen sehmden olup sihâm-ı mezbûreden altı yüz otuz beş sehmi ibn-i merkūm Hüseyin’e ve beş yüz altmış bir sehmi bint-i mezbûre Saliha’ya ve seksen dört sehmi zevc-i merkūm Mehmed’e isâbeti tahakkukundan sonra verese-i merkūmûndan müteveffâ-yı evvel-i mezbûrun kızı mukaddemâ sagīre ve el-yevm tahmînen on altı yaşında olup sin ve cüssesinin bülûğa tahammülü ve bülûğunu mukırra ve mu‘terife ve ol vechile âkıle ve reşîde olduğunu kısmet-i askeriye mahkemesinden verilen bir kıt‘a i‘lâm-ı şer‘î mantûkunca lede’ş-şer‘i’l-enver sâbit ve mütehakkık olan sâhibe-i arzuhâl mu‘arrefetü’z-zât mezbûre Saliha nâm-ı diğer Fâtıma Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kasaba-i mezkûre ahâlîsinden derûn-ı arzuhâlde isimleri mezkûr Abdülhamid Ağa b. Osman ve Moravî Ömer Ağa b. Hasan muvâcehelerinde Darıcalı Mustafa Reis b. Osman ile el-Hâc Ali Ağa b. Ahmed asâleten ve bundan akdem vefât eden el-Hâc Emin Ağa b. Mehmed’in verâse-i münhasırası ve terekesine bi’l-verâse vaz‘-ı yedleri mütehakkık olan zevce-i menkûha-i metrûkesi Ümmügülsüm bt. İsmail nâm hatun ve sulbî kebîr oğulları Mehmed Sâbit ve Osman’dan merkūm Mehmed Sâbit kendi nefsinden asâleten ve anası merkūme Ümmügülsüm Hatun ve karındaşı merkūm Osman taraflarından vekîl-i müsbet-i şer‘îleri olmağla vekâleten her biri hâzır oldukları hâlde bin iki yüz kırk dokuz senesi Muharremi’l-harâmı gurresinden sene-i mezkûre Zilhiccetü’ş-şerîfe gāyetine gelince bir sene idâre etmek üzere kasaba-i mezkûreye tâbi‘ Hersek karyesinde vâki‘ kirâhânenin kirâcıbaşılığı bi’l-cümle kasaba-i mezkûre ahâlîsinin re’y ve ittifâkıyla yirmi dört bin beş yüz guruş i‘âne ile mûrisim babam müteveffâ-yı evvel-i merkūm Hasan Ağa’ya hayatında ihâle ve tefvîz olundukda ol dahi ber-vech-i muharrer tefevvüz ve ta‘ahhüd ve kabûl ve kirâhâne-i mezkûreyi bir mâh müddet idâre ve ba‘dehu vefât etdikde yerine işbu mezbûrân Ömer Ağa ve Abdülhamid Ağa bi’l-ma‘iyye kirâcıbaşı olduklarına binâen mûrisim babam müteveffâ-yı evvel-i mezbûr Hasan Ağa’nın kirâhâne-i mezkûreye müddet-i merkūme zarfında malından vaz‘ eylediği mecmû‘u dokuz bin beş yüz guruş kıymetli iki yüz mıh ve yüz elli geyim na‘l ve iki çift ip ve on iki keçe ve on bir re’s tonbay ineği ve yedi re’s bârgir ve dört bin beş yüz guruşluk yedi yüz elli keyl şa‘îr ile kezâlik malından çekmece derûnunda mevcûd beş bin beş yüz guruş nakdini mezbûrân Abdülhamid Ağa ve Ömer Ağa bi’l-ma‘iyye bi-gayr-ı hakkın fuzûlî gasben ahzetmeleriyle eşyâ ve hayvânât ve şa‘îr ve nakd-i mezkûrlardan ber-mûceb-i münâsaha-i mezkûre hisse-i irsiyelerimi merkūmân Abdülhamid Ağa ve Ömer Ağa’dan ve babam müteveffâ-yı evvel-i mezbûrun tereke-i mebî‘ası esmânından hâzırûn-ı mezbûrûndan Darıcalı Mustafa Reis’in bundan akdem fuzûlî ve bi-gayr-ı hakkın gasben ahz ve istihlâk eylediği üç yüz yetmiş beş guruş ve mezbûr el-Hâc Ali Ağa’nın kezâlik ahz ve istihlâk eylediği dört yüz guruş ve müteveffâ-yı merkūm el-Hâc Emin Ağa’nın dahi [14a] hayatında kezâlik gasben ahz ve istihlâk eylediği beş yüz elli guruş ki cem‘an bin üç yüz yirmi beş guruşdan dahi ber-tashîh-i merkūm hisse-i irsiyemi hâzırân-ı mezbûrân Mustafa Reis ve el-Hâc Ali Ağa ile verese-i asîl-i hâzır ve müvekkil-i merkūmûn Mehmed Sâbit ve Osman ve Ümmügülsüm hatundan bi’l-verâse taleb ederim deyü da‘vâya tasaddî etmiş idim. El-hâletü hâzihî merkūmân Abdülhamid Ağa ve Ömer Ağa ile hâzırân-ı mezbûrân Mustafa Reis ve el-Hâc Ali Ağa verese-i asîl-i hâzır ve müvekkil-i merkūmûn Mehmed Sâbit ve Osman ve Ümmügülsüm hatundan her biri bi-tarîkı’s-sulh bi’l-ma‘iyye bana mâllarından bin sekiz yüz guruş def‘ ü teslîm eylediklerinde ben dahi yedlerinden ahz u kabz etmekle bi’l-cümle zikr olunan husûslara ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan mezbûrân Abdülhamid Ağa ve Ömer Ağa ile hâzırân-ı merkūmân Mustafa Reis ve el-Hâc Ali Ağa verese-i asîl-i hâzır ve müvekkil-i mezbûrûn Mehmed Sâbit ve Osman ve Ümmügülsüm hatundan her birinin zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim deyü ikrâr ve tasâdıkları tescîl ve huzûr-ı âlîlerine i‘lâm olundu.

Fî 11 Ra sene [1]256.