Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 144 Hüküm no: 239 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Paşa Vakfı’na ait İzmit’teki beş göz değirmenin üç yıllığına Hüseyin b. Çalapverdi’ye kiralandığı Yevmü’l-hamîs, fî 26 Kaziyye-i Keyvan Kethüdâ Vech-i tahrîr-i hurûf oldur ki Merhûm ve mağfûrun-leh Sinan Paşa Evkāfı’na hâliyâ mütevellî olan kıdvetü’l-emâsil ve’l-akrân Keyvan Kethüdâ meclis-i şerîfde hâzır olup İznikmid kazâsına tâbi‘ Canbazlar nâm karyeden Hüseyin b. Çalapverdi nâm kimesne muvâcehesinde ikrâr-ı şer‘î kılıp dedi ki merhûmun evkāfından kazâ-i mezkûre kurbünde Toppîrî nâm karye sınırında Kelaz nâm nehr-i cârî üzerinde daimî ve altı deverân eden beş göz değirmeni işbu sene seb‘a ve sittîn ve tis‘a mi’e Cemâziyelâhiri’nin gurresinden üç yıl tamâmına değin on sekiz bin akçeye her senede altışar bin akçe verip ve her dörder ayda ikişer bin vermek şartı ile mezkûr değirmenin büyük bendinden ve taşından ve tuc[un]dan ve oluğundan ve damından ve çarhından bu zikr olunan altıdan gayrı ki levâzımından ve mühimmâtından her ne ise ve bi’l-cümle işbu Hüseyin b. Çalapverdi uhdesinde olmak üzere mezkûr değirmenleri mukāta‘aya verdim dedikde mukırr-ı mezbûrun ikrârı ve kavl-i meşrûhunu bi’l-müvâcehe mezbûr Hüseyin dahi şart-ı mezkûr üzere mukāta‘aya merkūm kabûl ve tasdîk edip sıhhat-ı mukāta‘aya kıbel-i şer‘den temessük iltimâs etmeğin bu vesîka-i şer‘iyye ketb olunup yed-i tâlibe def‘ olundu lede’l-hâce ihticâc edine cerâ zâlik ve hurrire Fî gurre-i Cemâziyelâhir sene 967. Şuhûd: İsmail Çelebi b. Hayreddin, Nebî b. Hâzır er-râcil, Mehmed Çelebi b. Ali, Hürrem b. Abdullah, İbrahim Bey b. Abdullah et-tüccar, İskender kethüdâ-yı Çiftlik-i Sinan Paşa, İlyas b. Abdullah ve gayruhüm mine’l-hâzırîn.